AZ
RU
Leyla Yunus təxribat xəbərdarlığı edib
Vəkil Əlayif Hüseynov sentyabrın 3-də Bakı İstintaq Təcridxanasında saxlanan Sülh və Demokratiya İnstitutunun rəhbəri Leyla Yunusa baş çəkib.
"Xeberinfo.com": “Media forum” saytına danışan vəkil deyib ki, Leyla Yunusun həyatına real təhlükə var: “Leyla Yunusda məlumat var ki, ona təxribat hazırlanır. Onunla bir kamerada saxlanan Nuriyyə Hüseynovadan və təcridxana nəzarətçisi Nəzakət Məmmədovadan şikayətlənir. Deyir ki, Nuriyyə Hüseynovanın davranışları onu özündən çıxartmağa yönəlib. Nuriyyə Hüseynova Leyla Yunusun qohumlarının gətirdiyi bəzi şeyləri onun əlindən alır, içəridə söyüş söyür, Leyla xanımın istirahət etməsinə, yuyunmasına imkan vermir. Leyla xanımın fikrincə, təxribat hazırlayıb onu karserə salmaq, onun tibbi yardımsız, yeməksiz qalmasına nail olmaq, bununla da səhhətinə zərbə vurmaq istəyirlər. Leyla Yunus şəkər xəstəsidir, onun səhhəti hər an pisləşə bilər. Leyla xanımın ayaq barmağında da problem var, amma bu yöndə zəruri tibbi yardım ala bilmir.
O, Bakı İstintaq Təcridxanasının rəis müavini İlham Baxşəliyevlə görüşmək istəyir. Rəsmi müraciət etməsinə baxmayaraq həbsxana rəhbərliyi onu qəbul etmir. Bütün məsələ ona yönəldilir ki, guya həbsxana rəhbərliyi Leyla Yunusun problemlərindən xəbərsizdir. Yəni sabah hadisə olsa, məsuliyyəti öz üzərlərindən atsınlar. Gün ərzində kamerada işığın söndürülməsinə imkan verilmir. Təlimata görə, gecələr işıq azaldılmalıdır. Leyla xanıma yaxınları ilə telefon əlaqəsi saxlamağa da imkan verilmir.
Ədliyyə Nazirliyinin, Penitensiar Xidmətin rəhbərlərindən xahiş edirəm ki, bu məsələni diqqət mərkəzində saxlasınlar. Kimlərinsə Azərbaycan dövlətini biabır etməsinə imkan verməsinlər. Hər bir insanın təhlükəsizliyi dövlət tərəfindən qorunmalıdır. Kimlərinsə dövlət qurumlarından şəxsi məqsədlər üçün istifadə etməsinə imkan verməsinlər, bunun qarşısını alsınlar”.
Leyla Yunus iyulun 30-da həbs edilib. Onun həyat yoldaşı, Sülh və Demokratiya İnstitutunun eksperti Arif Yunus isə avqustun 5-də tutulub. Onlar dövlətə xəyanətdə və iqtisadi cinayətlərdə ittiham olunurlar.
.jpg)
