“O adam elə adam deyil ki, onu bir balaca sındıran kimi, kiminsə üstünə nəsə atsın”

“Akif Çovdarov bu günə qədər öz nazirinə qarşı heç bir söz deməyib və o, ümumiyyətlə Eldar Mahmudovu heç bir əməldə ittiham edən deyil”.
Xeberinfo.com:   Bu sözləri Lent.az-a açıqlamasında Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov vəkili Kamandar Nəsibov deyib. Vəkil həbsdə olan general Akif Çovdarovun məhkəmə dövründə sabiq MTN naziri Eldar Mahmudovla bağlı hansısa açıqlama verib-verməyəcəyi və ya sabiq naziri şahid qismində məhkəməyə dəvət edib-etməyəcəyi barədə suala cavab verib.

K.Nəsibov bildirib ki, A.Çovdarovun bu günə qədər də öz nazirinə hörməti böyükdür və bu hörmət həmişə qalacaq: “O adam elə adam deyil ki, onu bir balaca sındıran kimi, kiminsə üstünə nəsə atsın. Akif Çovdarovun Eldar Mahmudovun əleyhinə deyəsi ümumiyyətlə heç bir məsələ yoxdur. Akif Çovdarov deyir ki, əgər o, hansısa qanunsuzluq edibsə, bunun cavabını özü verəcək, yox əgər onun boynuna hansısa cinayəti qoymaq istəyirlərsə, məhkəmədə buna da aydınlıq gətirəcək”.

Vəkil Akif Çovdarovun həbsindən sonra Eldar Mahmudovla hər hansı bir formada əlaqə yaradıb-yaratmadığı barədə isə bildirib ki, belə bir əlaqə olmayıb və buna ümumiyyətlə ehtiyac da yaranmayıb.