AZ
RU
Sahibkarlar vergi yoxlamalarının birləşdirilməsini təklif edir
Amerika Ticarət Palatasının (AmCham) Azərbaycan hökumətinə iqtisadi islahatlarla bağlı təqdim etdiyi təkliflər paketində vergi cinayətləri ilə bağlı təkliflər də var.
Xeberinfo.com: Bunu “Report”a açıqlamasında "AmCham"ın Vergi və gömrük Komitəsinin sədri Bəxtiyar Aslanbəyli deyib: "Mövcud qanunvericiliyə əsasən, 2 min manatdan artıq məbləğdə vergidən yayınma faktı aşkarlanan zaman, bu, vergi cinayəti sayılır. Hesab edir ki, bu, çox aşağı məbləğdir və bunun artırılmasını təklif etdik".
Komitə sədri bildirib ki, "AmCham" Vergilər Nazirliyinin vergi təhqiqatları aparmasını da doğru hesab etmir: “Vergilər Nazirliyinin həm vergi siyasətini həyata keçirməsi, həm də vergi təhqiqatları aparması düzgün deyil. "AmCham"ın vergi cinayətləri ilə bağlı təklifini Prezident Adminstrasiyası istəyib, biz də təqdim etmişik. Məsələn, Gürcüstanda bu rəqəm Azərbaycandakından dəfələrlə çoxdur”.
B.Aslanbəylinin sözlərinə görə, vergi cinayətləri ilə bağlı məsələlərdə interpretasiya fərqi (hesablanma mexanizminə fərqli yanaşma) nəzərə alınmalıdır: “Əgər sahibkar planlı şəkildə vergidən yayınırsa, bu, başqa məsələdir. Lakin sahibkarın qanunvericiliklə bağlı interpretasiyası vergi müfəttişinin qanunvericiliyə yanaşmasından fərqlidirsə, bu da başqa məsələdir. Yəni, sahibkar dövriyyəsini gizlətmir, sadəcə qanunvericiliyə yanaşması fərqlidir. Hətta rəqəm fərqi 25 min manatdan artıq olsa belə, bu, cinayət məsuliyyəti yaratmamalıdır”.
"AmCham" rəsmisi hökumətə inzibati islahatlarla bağlı hər hansı təklifin verilmədiyini də açıqlayıb: “Vergilər Nazirliyi və Dövlət Sosial Müdafiə Fondunun (DSMF) yoxlamalarının birləşdirilməsi ilə bağlı təkliflərimiz var. Sahibkarların vergiyə cəlb edilən əmək haqqı bazasını həm Vergilər Nazirliyi, həm də DSMF yoxlayır. Təcrübədə o da mövcuddur ki, həmin baza ilə bağlı hər iki qurumun fərqli yanaşması olur və bu, əlavə problemlər yaradır. Ona görə də təklif etmişik ki, DSMF-nin yoxlama hüququ əlindən alınaraq Vergilrə Nazirliyinə verilsin".
.jpg)
