Kolumbiya hökuməti narkotik baronu Pablo Eskobar tərəfindən ölkəyə gətirilmiş begemotların sürətlə artan populyasiyasına qarşı mübahisəli qərar qəbul edib.

Yenixeberorg.com: Hazırda sayı təxminən 200-ə çatan begemotların 80-ə qədərinin ovlanması planlaşdırılır.

Məqsəd ekoloji tarazlığı qorumaq və insan təhlükəsizliyinə yönələn riskləri azaltmaqdır.

Bu heyvanların tarixi 1980-ci illərə gedib çıxır. Eskobarın “Hacienda Napoles” adlı malikanəsində yaradılmış şəxsi zooparkdan qaçan dörd begemot zamanla nəzarətdən çıxaraq, vəhşi təbiətdə sürətlə çoxalıb. Təbii yırtıcıların olmaması onların sayının kəskin artmasına səbəb olub.

Hazırda begemotlar, əsasən, Maqdalena çayı hövzəsində yayılıb, yerli flora və faunaya ciddi ziyan vurur. Onların kənd təsərrüfatı sahələrinə və su mənbələrinə təsir etdiyi, həmçinin insanlar üçün təhlükə yaratdığı bildirilir.

Hökumət bu vəziyyəti artan ekoloji böhran kimi qiymətləndirir və populyasiyanın nəzarət altına alınmasının zəruri olduğunu vurğulayır.

Lakin qərar heyvan hüquqları müdafiəçiləri tərəfindən sərt tənqid olunub. Fəallar begemotların məhv edilməsi əvəzinə sterilizasiya və nəzarətli köçürülmə kimi alternativ üsulların tətbiqini təklif edirlər.