Təhsil naziri kredit sisteminin tətbiqi ilə bağlı tədris sənədlərinin nümunələrini təsdiq edib

       "xeberinfo.com": "Ali təhsil müəssisələrinin bakalavriat və magistratura səviyyələrində kredit sistemi ilə tədrisin təşkili Qaydaları"nın təsdiq edilməsi haqqında təhsil naziri Mikayıl Cabbarov əmr imzalayıb. Nazirlikdən əldə etdiyimiz  məlumata görə, əmrə əsasən ali təhsil müəssisələri tədris prosesinin "Ali təhsil müəssisələrinin bakalavriat və magistratura səviyyələrində kredit sistemi ilə tədrisin təşkili Qaydaları"nın tələblərinə və tədris sənədlərinin təsdiq olunmuş nümunələrinə uyğun aparılacaq. 
     Əmrdə qeyd olunub ki, kredit sisteminin tətbiqi ilə bağlı tədris sənədlərinin (tədris planı, tədris qrafiki, ixtisas üzrə illik işçi tədris planı, tələbənin fərdi iş planı, müəllimin illik işçi tədris planı, dərs cədvəli, akademik transkript, tələbənin ərizə forması, tədris razılığı, akademik arayış, akademik təqvim, məlumat paketinin strukturu) nümunələri təsdiq edilib.

     Sənəddə göstərilib ki, əmr 2014-cü tədris ilinin ikinci semestrinin əvvəlindən qüvvəyə minəcək.

     Əmrin icrasına nəzarət nazir müavini Ceyhun Bayramova tapşırılıb.