Rusiyanın bir neçə aydan sonra Ukraynanı işğal etməyə hazırlaşdığına dair artan xəbərlər və kəşfiyyat məlumatları regionda vəziyyəti gərginləşdirməyə davam edir.
Yenixeber.org: "Avia.pro" saytı NATO qoşunlarının Belarus sərhədinə yerləşdirildiyini yazıb.
Bildirilir ki, hazırda Belarus-Polşa sərhədindəki bölgəyə yüzlərlə hərbi texnika gətirilib. Bunların arasında zirehli texnika, motorlu artilleriya qurğuları, reaktiv yaylım atəşi, hava hücumundan müdafiə sistemləri və tanklar diqqət çəkib.

Baş verənlər NATO-nun vəziyyətə müdaxilə qərarı kimi şərh edilir.
Mövcud vəziyyəti nəzərə alan ekspertlər hesab edir ki, Belarus yaxın günlərdə Rusiya ordusunun Polşa sərhədinə yerləşdirilməsini xahiş edə bilər.
Bir neçə min hərbi texnika artıq Yelnya yaxınlığındadır və döyüşə hazırdır, əmr gözləyir.
Qeyd edək ki, ötən gün Ukrayna Müdafiə Kəşfiyyat İdarəsinin rəhbəri "Military Times"-a bildirib ki, Rusiyanın Ukrayna sərhədlərində 92 mindən çox əsgəri var. Ruslar yanvarın sonu və ya fevralın əvvəlində hücuma hazırlaşır.