Belarus Prezidenti Aleksandr Lukaşenko Avropa Birliyi və qonşu Litvanın sanksiyalarla bağlı qərarına sərt reaksiya verib.

Yenixeber.org: Belarus mətbuatında prezidentin ölkədəki zavodların birinə səfəri zamanı xüsusilə Litvanın ünvanına səsləndirdiyi sərt açıqlamalar yer alıb.

Lukaşenki bildirib ki, Belarus qonşu ölkəyə qarşı cavab olaraq, müxtəlif sahələr, xüsusilə də nəqliyyat, yükdaşımaları, aviasiya və s. istiqamətlər üzrə sanksiyalar tətbiq edəcək: “Biz onlara göstərərik sanksiya nə deməkdir. Əgər onlar əvvəl Çinə və Rusiyaya bizim üzərimizdən gedirdilərsə, ticarət edirdilərsə, indi Qara dəniz və Baltik dənizi üzərindən uçub gedərlər.”

Bununla da Belarus prezidenti hava və quru sərhədlərini Litva və Avropa Birliyi ölkələri üçün bağlayacaqlarının anonsunu verib.

Lukaşenko artıq Litva limanları üzərindən göndərilməli olan yüklərin başqa istiqamətlərə yönləndirilməsinə dair göstəriş verdiyini də bildirib: “Görək onlar(Litva-red.) indi necə yaşayacaqlar. Litva büdcəsinin 30 faizi bizim həmin ölkə ərazisindən keçən yükdaşımalarımız hesabına formalaşır. Daha nə istəyirlər? Biz onları öz yerlərinə oturdarıq.”

Belarus prezidenti Avropa ölkələrinin “Belarusun nə demək olduğunu unutduqlarını” söyləyib: “Düşünürdülər ki, tanklarla, raketlərlə bizi əyə, qorxuda bilərlər. Hələ baxarıq, kim kimi qorxudacaq...”

Xatırladaq ki, Litva məlum hadisələrlə bağlı Lukaşenkoya və yüzlərlə Belarus məmuruna qarşı sanksiya tətbiq etdiyini açıqlayıb.

(azpolitika)