Yenixeber.org: Xəbər verildiyi kimi paytaxtın bir neçə rayonunda abadlıq işlərinin aparılması və qəzalı vəziyyətdə olan binaların sökülməsi, yerində müasir tələblərə uyğun yenilərinin tikilməsi ilə bağlı qərar verilib.Məqsəd qəzalı vəziyyətdə olan binalarda yaşayan sakinlərin mənzil-məişət şəraitinin yaxşılaşdırılmasıdır. Xatırladaq ki, bununla bağlı keçən ilin fevral ayında Nazirlər Kabineti 86 saylı qərar qəbul edib. Belə ki, 5 il müddətində paytaxtın 9 rayonunda köhnə binalar sökülərək yeniləri ilə əvəz ediləcək. Bu binalara əsasən istismar müddəti bitmiş və qəzalı vəziyyətdə olanlar daxildir ki, onlar da yeniləri ilə əvəzlənməlidir.

Maraqlıdır, 9 rayon üzrə söküntü və tikinti işlərinin aparılmasına Azərbaycanın vəsaiti yetəcəkmi?Ümumiyyətlə, bu işlərin görülüb bitməsinə maliyyə haradan ayrılacaq?

Əmlak məsələləri üzrə ekspert Nüsrət İbrahimli “Cümhuriyət” qəzetinə açıqlamasında deyib ki, bu qərar istismar müddəti bitmiş binalarda yaşayan sakinlərin mənzil şəraitinin yaxşılaşdırılması üçün nəzərdə tutulub: “Bu qərarın icrası büdcədən deyil, büdcədən kənar nəzərdə tutulub. Yəni investorların cəlb edilməsi ilə bu proses həyata keçəcək. Bəzi tikinti şirkətləri, fiziki şəxslər, kənar investorlar, bir sözlə layihədə kimlər iştirak edə bilənlər bu layihəyə cəlb ediləcək.Layihədə kimlər iştirak etmək istəyirlər, onlar yerli icra hakimiyyətlərinə müraciət edəcəklər və müvafiq tenderdə iştirak edəcəklər”.

Ekspert qeyd edib ki, söküntü və abadlıq işlərinin tam başa çatması 5 il ərzində nəzərdə planlaşdırılıb: “Sadəcə prosesin gedişatına baxmaq lazımdır ki, nə qədər müraciət edənlər olacaq. Hər halda sənəddə 5 il yazılıb”.

Ekspert layihəyə külli miqdarda vəsaitin sərf olunacağını da əlavə edib. Qeyd edək ki, qərarda bildirilir ki, mülki, mənzil, şəhərsalma və tikinti qanunvericiliklərinin tələblərinə əməl etməklə, şəhərin ümumi görünüşünə xələl gətirən, qəzalı vəziyyətdə və mövcud şəhərsalma normalarına cavab verməyən 9 rayon üzrə söküntü və abadlıq işləri aparılacaq. Həmin rayonlar aşağıdakılardır: Suraxanı rayonu üzrə 3828 nəfərin yaşadığı, 1127 mənzildən ibarət olan, uzunmüddətli istismar nəticəsində yararsız vəziyyətə düşmüş 63 yaşayış binasının, Nəsimi rayonu üzrə XIX əsrin sonları və ötən əsrin əvvəllərində tikilmiş, 16206 nəfərin yaşadığı 5771 mənzildən ibarət 226 yaşayış binasının, Xətai rayonu üzrə 6956 nəfərin yaşadığı 2016 mənzildən ibarət 99 yaşayış binasının, Nərimanov rayonu üzrə 11031 nəfərin yaşadığı 3028 mənzildən ibarət 219 yaşayış binasının, Nizami rayonu üzrə keçən əsrin 50-60-cı illərində inşa edilmiş, 5395 nəfərin yaşadığı 1779 mənzildən ibarət 131 yaşayış binasının, Yasamal rayonu üzrə 1257 nəfərin yaşadığı 427 mənzildən ibarət 18 yaşayış binasının, Səbail rayonu üzrə 1819 nəfərin yaşadığı 535 mənzildən ibarət 41 yaşayış binasının, Pirallahı rayonu üzrə 3131 nəfərin yaşadığı 1174 mənzildən ibarət 297 yaşayış binasının, habelə bu rayonların ərazisində yaşayış üçün yararsız olan digər binaların, sosial və digər təyinatlı qeyri - yaşayış obyektlərinin sökülməsi və yenidən qurulması həyata keçiriləcək. Bundan əlavə mənzil fondunun yenilənməsi, sakinlərin mənzil-məişət şəraitinin yaxşılaşdırılması məqsədi ilə tikinti şirkətləri tərəfindən öz vəsaitləri və ya cəlb ediləcək kredit vəsaitləri hesabına inşa olunacaq çoxmənzilli yaşayış binaları üçün qəzalı vəziyyətdə olan söküləcək tikililərin ərazilərindən istifadə edilməsinə, hüquqi və fiziki şəxslərin mülkiyyətində və ya istifadəsində olan torpaq sahələrinin mülki qanunvericiliyə uyğun olaraq onların razılığı ilə dəyəri ödənilməklə əldə edilməsinə və ya həmin torpaq sahələrinin əvəzləşdirilməsinə şərait yaradılmalıdır. Qanunvericiliyin tələblərinə uyğun olaraq qəzalı vəziyyətdə olan binaları sökərək, onların yerində yeni yaşayış binası tikməyi öhdəsinə götürən tikinti şirkətləri, bu binalardan köçürülən sakinlərin müvəqqəti olaraq kirayə edilmiş mənzillərdə yerləşdirilməsi üçün lazımi maliyyə vəsaitinin ödənilməsini və həmin sakinlərə sökülmüş tikililərin yerində yeni tikiləcək yaşayış binasında müvafiq mənzillərin ayrılmasını təmin etməlidir.Bununla bağlı Suraxanı, Nəsimi, Xətai, Nərimanov, Nizami, Yasamal, Səbail, Pirallahı, Xəzər rayon icra hakimiyyətlərinə xüsusi tapşırıq da verilib.