Sumqayıt şəhəri 21 saylı məktəbin meydançasında tikinti işləri aparılır.

Yenixeber.org:   Sakinlər ərazidə qeyri-qanuni tikintinin aparıldığını iddia edirək etiraz edirlər. Şikayətçilər meydançanın sahəsində çoxmərtəbəli yaşayış binasınin tikilmək planının olduğunu deyirlər.

Tikinti işlərindən narahat olan sakinlər yerli icra hakimiyyətinə və Təhsil Nazirliyinin qaynar xəttinə şikayət ediblər.

Bu barədə “Bizim Yol”a sakin, birinci qrup əlil Vüqar Xəlilov məlumat verib.

“12-ci mikrorayonda yerləşən sözügedən məktəbin meydançası ətraf ərazilərdə yaşayan uşaqların da asudə vaxtının keçirdiyi yerdir. Amma məktəb meydançasını qəsdən dağıdıblar, onu yararsız vəziyyətə salıblar. Bir müddətdir ki, həmin ərazi hasarlanıb, bəzi ərazilərdə tikilinin təməli atılıb, kənarlarda isə texnikalar işləyir. Biz sakinlərin dəfələrlə etdiyi narazılıqlardan sonra tikinti işləri dayandırılıb. Amma ərazidə hasarlama işləri davam edir. Bizim şikayətimiz əsasında müvafiq qurumların əməkdaşları əraziyə gəldilər. Amma problem həll olunmadı. Biz sakinlər vəziyyətdən çox narahatıq”,-deyə V.Xəlilov bildirib.

O deyir ki, məktəbin ətrafında əlillərin yaşadığı 36 və 96 mənzildən ibarət iki yaşayış binası var. Burada digər yaşayış obyektləri də var. Bütün sakinlər mövcud vəziyyətdən narahatdırlar. Nə hökumət təşkilatları, nə də tikinti aparan şirkət sakinlərin müraciətinə cavab verməyib.

Ehtimala görə, həmin ərazidə qapalı futbol meydançası və sosial evlər inşa olunacaq.

Qeyd edək ki, Sumqayıt şəhəri 21 saylı məktəb 1970-ci ildən fəaliyyət göstərir. Təhsil müəssisəndə 1793 nəfərlik şagird yeri var.

Problemlə bağlı Təhsil Nazirliyinə informasiya sorğusu göndərilib.