ABŞ Konqresinin Nümayəndələr palatası prezident Trump-ın impiçmenti üçün səsvermə ilə başa çatacaq tarixi iclasını keçirir.

Yenixeber.org: Prezidentə qarşı iki ittiham təqdim olunub: o, Demokratlar Partiyasından siyasi rəqibi Joe Biden-in istintaqını aparmaq üçün Ukraynaya təzyiq cəhdində və impiçment təhqiqatında Konqresə maneçilik törətməkdə təqsirləndirilir.

Müzakirələrdən sonra prezidentə qarşı irəli sürülən iki ittihamın hər biri üzrə ayrıca səs vermə keçirilməlidir.

Donald Trump ittihamları rədd edir.

ABŞ Konstitusiyasına əsasən, Nümayəndələr palatası prezidentin impiçmenti üçün səs vermək hüququna malikdir, bundan sonra Senat iddiaları nəzərdən keçirir və prezidentin hakimiyyətdən uzaqlaşdırılması ilə bağlı səs verir.

Nümayəndələr palatasındakı Demokratlar impiçmenti dəstəkləmək üçün, tələb olunan sadə çoxluğa malikdir.

Bundan sonra, məsələ Yuxarı palataya - Senata təqdim olunmalıdır. Burada prezidentin impiçmenti üçün səslərin üçdə ikisi tələb olunur.

Senatda Nümayəndələr palatasının üzvləri ittihamçı, senatorlar isə hakim rolunda çıxış edirlər.

Prezidenti dəstəkləyən Respublikaçıların Senatda çoxluğu var və Trump-ın hakimiyyətdən kənarlaşdırılması barədə qərarın təsdiqlənməsi qeyri-real görünür.

Bu günə qədər heç bir respublikaçı Trump-ın impiçmentini dəstəkləməyib.

İndiyədək ABŞ tarixində yalnız iki prezident - Andrew Johnson və Bill Clinton impiçment olunub. Lakin onların heç biri vəzifədən uzaqlaşdırılmayıb.(BBC)