Kreml heç bir halda Krımı geri qaytarmayacaq.

Yenixeber.org: Bu sözləri politoloq Elxan Şahinoğlu qeyd edib.

Siyasi şərhçinin sözlərinə görə, Rusiyanın Krımın ilhaqına haqq qazandıması qərarı beynəlxalq aləmə, bölgəyə, eləcə də Rusiyaya bir sıra çətinliklər gətirib:

“Birincisi, 2014-cü ilə qədər Rusiya-Ukrayna münasibətləri gərginləşdi. Bundan sonra Ukraynada prezident dəyişsə də, Krımın işğalına görə Kiyevin Moskva ilə əvvəlki isti münasibətlərini bərpa edəcəyi problematikdir.

İkincisi, Krımın işğalı davam etdikcə, Qərbin Rusiyaya qarşı sanksiyaları aradan qaldırılmayacaq. Aydındır ki, Kreml heç bir halda Krımı geri qaytarmayacaq. Demək, Rusiyaya qarşı sanksiyalar da davam edəcək. Sanksiyaların davamı isə Moskvanı Qərblə normal münasibətlərdən məhrum etməklə yanaşı, Rusiya iqtisadiyyatına da mənfi təsir edir.

Üçüncüsü, Krımın ilhaqı olmasaydı, bu gün beynəlxalq terrorizmə qarşı mübarizədə vahid mərkəz formalaşa bilərdi. Belə ki, ABŞ Rusiya ilə indiki qədər münaqişə içərisində olmayacaqdı və iki dövlət soyuq müharibə illərində olduğu kimi bir-birini uzaq mənzilli raketlərlə hədələməyəcəkdi.

Krımın işğalı sübut etdi ki, Rusiyanın siyasətində separatizmə dəstək davam edəcək. Kremlin Krımı dünyaya Rusiyanın ərazisi kimi tanıtdırması siyasəti 5 ildə iflasa uğradı”.