Suriyalı miqrantların evlərinə qayıtması üçün ortaq qrupun yaradılması ilə bağlı Türkiyənin Rusiyaya təklif etdiyi layihə qaçqınların geri dönməsinin başlanğıcı olacaq.
Yenixeber.org: Bu sözləri rusiyalı siyasi ekspert Yuri Zin deyib. O bildirib ki, ortaq qrup ölkələr arasında etibarın güclənməsinə və sığınacaq axtaranların evlərinə dönməsinə xidmət edəcək:
“Suriya torpaqlarının böyük qismi hökumətin nəzarətində olmasına baxmayaraq, bəzi çətinliklər var. Qərbdəki ölkələr miqrantların geri qayıtmasını dayandırmaq üçün mümkün olan hər şeyi edir. Yaradılması nəzərdə tutulan Türkiyə-Rusiya formatı sığınacaq probleminin həlli istiqamətində atılan addım olacaq. Rusiya Xarici İşlər naziri Sergey Lavrov bir neçə gün əvvəl Livanda görüşlər keçirdi. Livanın bu prosesə daxil olması məsələsində razılaşma əldə edildi. Sonra İordaniya və əlbəttə, Türkiyə gələcək. Çünki bu problem ən çox Türkiyəyə təsir etdi”.
Yuri Zin deyib ki, bu qrup Qərb ölkələrini də özünə cəlb edə bilər:
“Ortaq qrup bəlkə də öz imkanlarını və gücünü problemin həlli üçün istifadə etmək istəməyən Qərb ölkələrini də cəlb edər. Əlbəttə, BMT və Qərb də buna dəstək və yardım edə bilər. Tək problem istəkdir”.