Müxalif Milli Şura noyabrın 10-da Bakıda mitinq keçirəcək. Bakı Şəhər İcra Hakimiyyətinə göndərilən məktubda aksiyanın metronun “İnşaatçılar” stansiyası yaxınlığındakı stadionda saat 15-dən 17-dək keçiriləcəyi bəyan olunub.

    "Xeberinfoşcom": Mitinqdə siyasi məhbus məsələsinin, insan haqları və sosial durumla bağlı problemlərin gündəmə gətiriləcəyi bildirilir.

Noyabrın 3-də Milli Şuranın üzvü, AXCP sədrinin müavini Fuad Qəhrəmanlı “Media forum” saytının suallarını cavablandırıb.

- Mitinq hazırlıqları necə gedir?

- Hazırlıqlar davam edir. Xalq Cəbhəsinin yerli təşkilatları vətəndaşların mitinqə cəlb olunması istiqamətində fəaliyyət göstərir. Sosial şəbəkələrdə məlumatlandırma işləri aparılır. Çağırış vərəqələrinin paylanması nəzərdə tutulur. Mitinqə texniki hazırlıq da yekunlaşmaq üzrədir. İnanırıq ki, mitinq möhtəşəm keçəcək.

- Milli Şuraya daxil olmayan partiyalar mitinqə dəvət olunacaqlar?

- Milli Şura heç bir partiyaya xüsusi dəvət göndərməyəcək. Repressiyaların əleyhinə olan hər bir şəxs mitinqə gələ bilər.

- Bakı Şəhər İcra Hakimiyyətinə təşkilatçı kimi kimlərin imzası ilə müraciət olunub?

- Bakı Şəhər İcra Hakimiyyətinə mən, hüquqşünas Namizəd Səfərov və Azərbaycan Ziyalılar Birliyinin sədri Eldəniz Quliyev müraciət etmişik.