“Sizin müstəsna prinsipiallığınız…”

Rusiya azərbaycanlıları Federal Milli-Mədəni Muxtariyyətinin (“AzerRos”) Ağsaqqallar Şurasının rəhbəri Abbas Abbasov da prezidenti Vladimir Putini ad günü münasibətilə ürəkdən təbrik edənlərin sırasına qoşulub.

"Xeberinfo.com": Azerros.ru saytı Abbas Abbasovun Putinə ad günü təbrikinin mətnini yayıb.

“Sizin dövlətçi müdrikliyiniz, milli maraqların müdafiəsində müstəsna prinsipiallığınız, ölkəni layiqli və firəvan gələcəyə aparmağa yönələn yenilməz səyləriniz Sizi ölkənin ümummilli liderinə çevirib” – deyə Abbasov keçmiş Sov.İKP MK birinci katiblərinə zəhmətkeşlərdən göndərilən təbriklər ruhunda yazılmış məktubunda bildirir.

“Rusiya azərbaycanlıları da bizim ölkəmizdə yaşayan çox xalqlar kimi sizə Rusiya Federasiyasında sülhün, firəvanlığın və stabilliyin saxlanılması naminə gördüyünüz işlərə görə dərindən minnətdardır” – Abbas Abbasov əlavə edir.

Təbrik məktubunda Putinin Azərbaycanla Rusiya arasında münasibətlərin inkişafı üçün göstərdiyi səylər də minnətdarlıqla vurğulanır.

“Biz sizinlə Azərbaycan prezidenti İlham Əliyev arasında xeyirxah şəxsi münasibətləri yüksək qiymətləndiririk” – deyə baş nazirin keçmiş birinci müavini vurğulayır.(Azadliq.info)