Nazim İsmayılov Rüstəm Xəlilovun əleyhinə açıq kampaniyaya başlayıb

"Xeberinfo.com":  Məlumata görə, Sabirabad rayon İcra Hakimiyyətinin başçısı Nazim İsmayılovla bu rayondan seçilən deputat Rüstəm Xəlilov arasında ciddi konflikt yaranıb.

Bununla bağlı özəl informasiya Editor.az-a rayondakı mənbələrdən daxil olub.

Mənbənin sözlərinə görə, buna səbəb deputatın icra başçısının fəaliyyəti ilə bağı müsbət fikirlər bildirməkdən imtina etməsi olub: “Bir neçə ay öncə rayonda nazirlərdən birinin iştirakı ilə müşavirə keçirilib. Müşavirədən öncə icra başçısı deputatdan tələb edib ki, onun haqqında müsbət fikirlər səsləndirsin. Deputat bundan imtina edib. Hətta icra başçısına xitabən “Nə iş görmüsünüz ki, sizi müdafiə də edək. Bizi rayonda heç eşitmirlər, elə bil deputat yox, xırda məmuruq” söyləyib. Bundan əsəbləşən icra başçısı isə “Sənin də Milli Məclisdəki fəaliyyətindən xəbərimiz var. Bircə dəfə ağzını açıb, danışmamısan” deyərək, deputata qarşılıq verib. Həmin tədbirdə Rüstəm Xəlilova ümumiyyətlə söz verilməyib”.

Hazirda icra başçısın deputatın əleyhinə açıq kampaniya apardığını deyən mənbəmiz qeyd edir ki, Nazim ismayılov “Rüstəm bu rayondan deputat seçilsə, mənə Nazim deməsinlər” fikrini hər yerdə açıq şəkildə bəyan edir.

Editor.az-ın əməkdaşı məsələyə Sabirabad rayon İcra Hakimiyyətinin başçısı Nazim İsmayılovun və deputat Rüstəm Xəlilovun münasibətini öyrənmək istəsə də, hər iki şəxslə əlaqə saxlamaq cəhdlərimiz nəticə verməyib.

Editor.az