Qəbələ Telekommunikasiya Qovşağında da mənimsəmə faktları aşkarlanıb

Xeberinfo.com: Rabitə və Yüksək Texnologiyalar Nazirliyinin Qəbələ Telekommunikasiya Qovşağında (TKQ) apardığı son yoxlama ilə bağlı redaksiyamıza ilginc məlumatlar daxil olub. Nazir Ramin Quluzadənin şəxsən göstərişi ilə aparıldığı deyilən yoxlamalarla Qəbələ TKQ-da ciddi qanun pozuntuları aşkarlanıb. Hələlik yoxlamanın nəticələri ictimaiyyətə açıqlanmasa da, xeberinfo.com-a verilən məlumata görə “Regionlarda telefon şəbəkəsinin modernləşdirilməsi və yeni texnologiyaların tətbiqi layihəsi” çərçivəsində TKQ-larının mərkəzi ATS-lərinin TAE fiber-optik kabel magistralının Azərbaycan seqmentinə qoşulması Qəbələ rayonunda yumşaq desək yarasız icra olunub. Bundan əlavə rayon mərkəzi və kəndlərinin telefonlaşdırılması, eləcə də internet xidmətləri ilə də bağlı ciddi qüsurlar aşkarlanıb. Bu istiqamətdə ayrılan vəsait təyinatı üzrə xərclənməyib.

Məlumata görə Qəbələ TKQ-da aparılan yoxlamanı və hələ açıqlanmayan nəticəni “Rabitəçilərin işi”nin davamı da hesab etmək olar. Belə ki, 2002-ci il avqust ayının 30-dan Qəbələ TKQ-nin rəisi vəzifəsində çalışan Şahin Tağıyevin həbs olunmuş rabitəçilərlə, xüsusi ilə də  «Aztelekom» MMC-nin sabiq baş direktoru Məhəmməd Məmmədov və nazirliyin sabiq aparat rəhbəri Vidadi Zeynalovla zaman-zaman müəyyən “iş birliyi”də olduğu bildirilir...

Qəbələ TKQ-nın rəisi Şahin Tağıyevin fəaliyyəti, eləcə də sahib olduğu kapitalla bağlı bu günə qədər mətbuatda da çox yazılıb... Qəbələdə və paytaxtda kommersiya obyektləri, villalar və s. Görünür məlum “iş birliyi” ilə bağlı dolanan məlumatlar da həqiqətdən uzaq deyil. Bunca kapitala TKQ rəisinin aylıq məvacibi ilə sahib olmaq olarmı?

Məlumatla bağlı Şahin Tağıyevi də dinləmək istədik. Təəssüf ki, bu istiqamətdəki cəhdlərimiz nəticəsiz oldu.

Mövzu diqqətimizdədir.

Malik