Xarici ölkələrdən Azərbaycana gətirilən yüklərin Azərbaycanın gömrük sərhədini keçə bilməməsi ilə bağlı bəzi mətbuat orqanlarında yayılan məlumatlar tamamilə yanlış və əsassızdır

Yenixeber.org: Bu, xarici ölkələrdən Azərbaycana yüklərin çatdırılması ilə məşğul olan 12 əsas şirkətin kütləvi informasiya vasitələrinə və müştərilərinə ünvanladığı müraciətdə qeyd olunub.

Sənəddə bildirilib ki, xarici ölkələrdən Azərbaycana yüklərin çatdırılmasında heç bir problem yoxdur və sifarişlər qısa zaman ərzində müştərilərə çatdırılır.

“Məlumat üçün bildiririk ki, bizim təmsil etdiyimiz şirkətlər Azərbaycan Respublikasının qanunvericiliyinə əsasən tam fəaliyyət göstərir və sürətli poçt xidmətini yerinə yetirir.

Azərbaycan Respublikası Dövlət Gömrük Komitəsi tərəfindən fəaliyyətimizə heç bir məhdudiyyət qoyulmayıb və tam şəffaf şəkildə yüklərimizi gömrük sərhədindən keçiririk. Dövlət Gömrük Komitəsinin işindən, fəaliyyətindən razıyıq və heç bir iradımız yoxdur”, - deyə müraciətdə vurğulanıb.

Qeyd edək ki, müraciəti DHL Dərhal MMC-nin baş direktoru Şaiq Mansurov, TNT Azəri Ekspress MMC-nin baş direktoru Şaiq Qəribzadə, FEDEX ARS Ekspres MMC-nin baş direktoru Sevda Xanməmmədova, UPS UPS AZ MMC-nin baş direktoru Nazim Xudaverdiyev, NASİLLA MMC-nin baş direktoru Elnarə Qasımova, “ASE Asya” şirkətinin baş direktoru Rəşad Abbasov, ARAMEX Peqasus MMC-nin baş direktoru Aydın Məmmədov, CAMES MMC-nin baş direktoru Sübhan Cəfərov, QUTE MMC-nin baş direktoru Qətibə Hətəmova, BERKUT MMC-nin baş direktoru Şüküfə Abilova, MOVER MMC-nin icraçı direktoru Rüfət İbrahimov və BARAMİ MMC-nin baş direktoru İlham Mustafayev imzalayıb.

Xatırladaq ki, sosial şəbəkə və bir sıra mətbuat orqanlarında bəzi çatdırılma şirkətlərinin müştərilərinə müraciət edərək, sifariş olunan mallarının Azərbaycanın gömrük sərhədini keçə bilməməsi barədə məlumatlar yayılıb.