Maliyyə Nazirliyi dünən Standard and Poor’s agentliyinin Azərbaycanın kredit reytinqini bir pillə aşağı endirməsi ilə bağlı xəbərə münasibət bildirib.

Xeberinfo.com:   Nazirliyin yaydığı məlumatı olduğu kimi təqdim edirik:

“Bundan əvvəl, 31 iyul 2015-ci il tarixində agentlik tərəfindən Azərbaycan Respublikasının beynəlxalq kredit reytinqi investisiya “BBB-” səviyyəsində təsdiq edilib, proqnoz isə “mənfi” saxlanıb.

Agentliyin yaydığı son hesabatında reytinqin bir pillə endirilməsinə əsas səbəb kimi neftin ucuzlaşması, bunun ölkədəki iqtisadi artıma və makroiqtisadi sabitliyə təsiri göstərilir.

Maliyyə Nazirliyi “Standard ənd Purz” agentliyinin dərc etdiyi reytinq hesabatında bir sıra qeyri-dəqiqlikləri qeyd edərək qiymətləndirmənin nəticələri ilə razılaşmadığını və bundan təəssüfləndiyini bəyan edir.

Bununla yanaşı, Maliyyə Nazirliyi ümidvar olduğunu bildirir ki, neft və neft məhsullarının qiymətlərinin azalması fonunda dərhal ölkənin kredit reytinqini aşağı endirən “Standard ənd Purz” agentliyi xammal məhsullarının qiymətlərinin artacağı təqdirdə də eyni operativliyi göstərərək ölkənin investisiya səviyyəli reytinqini bərpa edəcək.