Bakıdakı valyutadəyişmə məntəqələri dolların satış qiymətini artırıblar

Xeberinfo.com:  Məlumata görə , əksər “exchange”lərdə 1 ABŞ dollarının alışı 1,72 manat, satışı isə 1,80 manata aparılır. Hətta bir sıra mübadilə şöbələri Dolları 1.83 manatdan satır.

Azərbaycan Mərkəzi Bankının bu günə olan rəsmi məzənnəsi dünənki səviyyədə – 1,5626 AZN/USD qalsa da, bu gün keçirilən valyuta hərracında tələbin yalnız 20% qarşılanması nəticəsində valyuta bazarında yenidən ajiotaj yaranıb. Məlumata görə, Azərbaycan Mərkəzi Bankı bu gün, yanvarın 7-də mütəşəkkil banklararası bazarda keçirdiyi valyuta hərracında 50 mln. ABŞ dolları satıb. Bununla da bankların cari tələbinin təxminən 20%-nin qarşılandığı bildirilir.
Həmçinin bu gün, neftin sərt düşməsi xəbərindən sonra dollar alanların sayının xeyli artdığı bildirilir.
Valyuta hərracları vasitəsilə mütəşəkkil bazarda kommersiya banklarına dollar kütləsi satan AMB satışı “ən yaxşı təklif” prinsipi ilə həyata keçirir. Dekabrın son günlərində gündəlik 100 mln. dollara yaxın valyuta satan AMB-nin mütəşəkkil valyuta bazarına intervensiyasının bu gün zəiflədiyi diqqətə çarpıb.
Dünən Mərkəzi Bank banklara dollar satmamışdı.
AzPolitika.info-nun məlumatına görə, Bakı vaxtı ilə 17:50-də Nyu-Yorkun NYMEX birjasında WTI neftinin qiyməti 1 barelə görə 1,31 dollar azalaraq 32,66 dollar təşkil edib.
ICE birjasında Brent markalı neftin qiyməti 1,25 dollar azalaraq 32,98 dollar olub.