"Maraqlı oyun oldu. Hər iki komanda ən yaxşı oyunlarından birini keçirdi. Futbolçularımı təbrik edirəm. Rəqibə qarşıdakı oyunlarda uğurlar arzulayıram. Düzdür, bu komanda son vaxtlar o qədər də yaxşı nəticələr qazanmır. Ancaq düşünürəm ki, məğlub olduqları bir çox oyunda yaxşı futbol sərgiləmişdilər. Bu cür hallar digər komandalarda da olur"

Yenixeber.org: Bunu "Qarabağ"ın baş məşqçisi Qurban Qurbanovsəfərdə "Zirə"yə 2:1 hesabı ilə qalib gəldikləri Topaz Premyer Liqasının XXV tur matçından sonra mətbuat konfransında deyib.

Daha sonra 46 yaşlı mütəxəssis jurnalistlərin suallarını cavablandırıb:

- Oyunda bir neçə dəyişiklik etmişdiniz. Bunlar çempionluğu artıq təmin etməyinizlə əlaqədar deyildi?

- Elə də dəyişiklik etməmişdim. Miçelin zədəsi var idi. Ona görə start heyətdə deyildi. Rəşad Sadıqovun da belində zədəsi olduğundan, bu matçda şans vermədim.

- "Qəbələ" ilə son turda keçiriləcək oyunun Bakıda baş tutma ehtimalı var. Buna münasibətiniz necədir?

- Bu barədə mən də mətbuatdan oxumuşam. Evdə oynamaq "Qəbələ"nin haqqıdır. Qəbələdə oynamağın əleyhinə deyiləm. Mənim üçün fərqi yoxdur.

- Şeydayevi komandada saxlayacaqsınız?

- Onun bizimlə müqavilə müddəti mayda başa çatacaq. Hələ ki, danışıqlarımız olmayıb. Nə "Trabzonspor”la, nə də Ramillə bu barədə danışmışıq.