Braziliyada keçirilən dünya çempionatı davam edir.

"Xeberinfo.com": Bu gecə yarımfinal mərhələsinə start verilib.

Mərhələnin ilk matçında Braziliya Almaniyanı sınağa çəkib. "Estadio Mineyro" stadionunda baş tutan oyun meydan sahibləri üçün rusvayçı hesabla başa çatıb. Belə ki, Almaniya Braziliyanı 7:1 hesabı ilə yenib. Toni Kroosla Andre Şkürrlenin dubl etdiyi matçda Tomas Müller, Miroslav Kloze və Sami Kedira hərəyə bir dəfə fərqlənib. Braziliyanın təsəlli qoluna isə Oskar imza atıb.

Qeyd edək ki, dünya çempionatının ən titullu komandası Braziliya indiyədək 11 dəfə yarımfinalda çıxış edib. 7 halda finala yüksələn "sambaçılar" 5 dəfə çempion olub. 4 dəfə yarımfinalda uduzan braziliyalılar 2 dəfə üçüncü yer uğrunda matçın qalibi olub. 24 ildi kuboka həsrət qalan Almaniya 13 dəfə yarımfinala vəsiqə qazanıb. 8-ci dəfə finala çıxan Berti Foqtsun həmyerliləri 3 dəfə qalib adını qazanıb. 5 dəfə yarımfinalda uduzan almanlar 4 halda üçüncü yeri tutub.

Onu da qeyd edək ki, yarımfinalın digər oyunu bu gecə Hollandiya və Argentina arasında keçiriləcək. Bu matçın qalibi finalda Almaniya, məğlubu isə 3-cü yer uğrunda oyunda Braziliya ilə qarşılaşacaq.

DÇ-2014
Yarımfinal
9 iyul

Braziliya - Almaniya 1:7
Qollar: Oskar, 90+1 - Tomas Müller, 11. Miroslav Kloze, 23. Toni Kroos, 25; 26. Sami Kedira, 29. Andre Şkürrle, 69; 79.