"Bütün dünyada olduğu kimi Azərbaycanda da Hepatit C virusuna yoluxma hallarında artım qeydə alınır". 

"Xeberinfo.com":  Məlumata görə, Səhiyyə Nazirliyində yaradılan Hepatit B və C virusuna yoluxmuş şəxslərin müayinə və müalicəsinin təşkili üzrə Komissiyanın sədr müavini Həqiqət Qədirova APA-ya açıqlamasında deyib ki, 2012-ci ildə Hepatit C-yə yoluxma hallarının sayı 133 hal idisə, 2013-cü ildə bu rəqəm 181 hal olub. Onun sözlərinə görə, Hepatit C-yə qarşı peyvənd olmadığı üçün yoluxma halları ildən-ilə artır.

H.Qədirova qeyd edib ki, Hepatit B virusuna yoluxma ilə bağlı vəziyyət daha müsbətdir: “Hepatit B-yə 2012-ci ildə 194 yoluxma halı qeydə alınmışdısa, 2013-cü ildə bu rəqəm 242 hal olub. Amma onu da qeyd etməliyəm ki, bu rəqəm 2012-ci illə müqayisədə 2013-cü ildə artsa da, ümumiyyətlə, 2008-ci ildən xəstələnmə halları 2 dəfə azalıb. Belə ki, 2009-cu ildə Hepatit B-yə 465 yoluxma halı olub. Artıq Hepatit B-yə qarşı peyvənd mövcuddur və bütün dünyada olduğu kimi Azərbaycanda da bu peyvənd aparılır”.