Dərbənddəki Şıxsalah qəbiristanlığında azərbaycanlıların daha bir müqəddəs ziyarətgahı təhqirə məruz qalıb.

"Xeberinfo.com":  Məlumata görə, hadisə yanvarın 11-də gecə saatlarında baş verib. Seyid Mirqafar ağanın həmin məzarlıqdakı türbəsi dağıdılıb.

Bu, son günlər ərzində baş verən ikinci belə vandalizm aktıdır. Dərbənd azərbaycanlıları Seyid Mirqafar ağanın türbəsin müqəddəs ziyarətgah sayır və onu əziz tuturlar. Həmin abidə bundan əvvəl yanvarın 6-da da naməlum şəxslər tərəfindən dağıdılmışdı. Dərbənd azərbaycanlları bu vəhşilikdən xəbər tutan kimi dərhal etiraz aksiyalarına başlamışdılar. Bundan sonra Dağıstanın hakimiyyət orqanları bu məsələ ətrafında ciddi araşdırmalara başlamışdılar. Bu gün isə həmin türbənin bərpa olunduğuna dair xəbər yayılmışdı.

Dərbənd azərbaycanlıları hesab edirlər ki, bu vəhşiliyin arxasında yerli sakinlərin Dərbənd meri İmam Yarəliyevin siyasətindən narazılığını millətlərarası münaqişəyə çevirmək istəyən naməlum və məkrli qüvvələr dayanır.

Nə şəhər rəhbərliyindən, nə də yerli hüquq-mühafizə orqanlarından bu vəhşiliyə hələlik heç bir münaqsibət bildirilməyib. Bu da gərginliyi artırır.

Yada salaq ki, yanvarın 10-da Dərbəndin yüzlərlə azərbaycanlı sakini şəhər merinin istefası tələbi ilə küçələrə çıxıb etiraz aksiyası keçirmişdilər(virtualaz.org).