Paytaxtın Nəsimi rayonunda qadını elektrik cərəyanı vurub.

Yenixeber.org:  Mayın 23-də Nəsimi Rayon Polis İdarəsinin 19-cu Polis Şöbəsindən rayon prokurorluğuna Novruzova Nazimə Əhməd qızının yaşadığı mənzilin hamam otağında yuyunarkən elektrik cərəyanı vurması nəticəsində ölməsi barədə məlumat daxil olub. Daxil olan məlumat əsasında dərhal rayon prokurorluğunun eksperti, “Azərişıq” ASC-nin Nəsimi rayon Enerji təchizat və satış idarəsinin mütəxəssislərinin iştirakı ilə hadisə yerinə baxış keçirilib, meyit daxili və xarici müayinə olunması üçün Məhkəmə Tibbi-Ekspertiza və Pataloji Anatomoiya birliyinin Nəsimi rayon şöbəsinə göndərilib.

Meyitə baxış zamanı hər hansı bir xəsarət aşkar edilməyib. İlkin araşdırma zamanı müəyyən edilib ki, 1978-ci il təvəllüdlü Füzuli rayonunda anadan olan, Bakı şəhəri Nəsimi rayonunda yaşayan Nazimə Novruzova hamamda yuyunarkən duş kabinəsinin duş alətinə elektrik cərəyanı keçib, nəticədə qadını elektrik cərəyanı vuraraq öldürüb.

Faktla bağlı Nəsimi rayon prokurorluğunda araşdırma aparılır.