Həbsdə olan jurnalist, “jam.az” saytının redaktoru Fikrət İbişbəylinin (Fərəməzoğlu) səhhətində ciddi problemlər var.

Xeberinfo.com:   Bu haqda jurnalistin hüquqlarını müdafiə komitəsi fevralın 14-də keçirilən mətbuat konfransında məlumat verib.

Hüquq müdafiəçisi Oqtay Gülalıyev deyir ki, həmin problemlər Fikrət Fərəməzoğlunun Baş Mütəşəkkil Cinayətkarlığa Qarşı Mübarizə İdarəsində (daha çox “bandotdel” kimi tanınır red.) saxlanıldığı 34 gün ərzində yaranıb. Hüquq müdafiəçisinin sözlərinə görə, jurnalist orada işgəncələrə məruz qalıb, iki dişi sındırılıb: “Fikrət hazırda ancaq ağrıkəsicilərin hesabına dayana bilir”.

Oqtay Gülalıyev məlumat verib ki, hazırda Azərbaycanda 10 jurnalist və bloqçu qanunsuz olaraq həbsdədi.

“Uşağının cızma-qarasını da ona vermirlər”

Fikrət Fərəməzoğlunun həyat yoldaşı Faiqə Nösrəti bildirib ki, əvvəlcə heç ağrıkəsici dərmanları da istintaq təcridxanasına buraxmırdılar. Sonradan onun vəziyyətinin günü gündən ağırlaşdığını görüb, icazə veriblər.

Həyat yoldaşının dediyinə görə, Fikrətə dəstək məktubları göndərilir, amma onların çatdırılmasına imkan vermirlər: “Fikrətə, hətta öz uşağının yazdığı cızma-qaraları da çatdırmağa imkan vermirlər”.

Vəkili Elçin Sadıqov hesab edir ki, Fikrət Fərəməzoğlu insan alverilə bağlı məsələləri araşdırıb, cəmiyyətə çatdırdığına görə cəzalandırılıb. Ona görə də bu həbs söz azadlığına basqı kimi dəyərləndirilməlidi: “Zərərçəkənlər məhkəmədə deyirlər ki, “Fikrət pul istəyib”. Harda istəyib – məlum deyil, nə qədər alıb – bilmirlər. Bunlar nə bilirlər bəs?”

“Xural” qəzetinin baş redaktoru Əvəz Zeynallı deyir ki, Fikrət Fərəməzoğlunun həbsinə görə Avropa Məhkəməsi Azərbaycan hökumətini cərimələyəcək. O, həmçinin qanunsuz həbs olunan jurnalistlərlə bağlı məsələnin daim gündəmdə saxlanmasının vacib olduğunu vurğulayıb: “Məhkəmə qərarı olmadan saytın fəaliyyətinin dayandırılması, sayta müdaxilə də qanun pozuntusudu”.

“İnsan alveri onları niyə narahat edir?”

“Fikrət insan alveri problemindən yazırdı. Maraqlıdı, bu məsələ niyə Baş Mütəşəkkil Cinayətkarlıqla Mübarizə İdarəsini narahat edir? İnsan alveri beynəlxalq aləmdə ciddi narahatlıq yaradan problemdi və buna qarşı mübarizə istənilən ölkədə hüquq-mühafizə orqanlarının nəzarətində olmalıdı”, – bu isə hüquq müdafiəçisi Xalid Bağırovun sözləridi.

azadliq.org