Rusiyanın keçmiş iqtisadi inkişaf naziri Aleksey Ulyukayevin əmlakının bir qisminə həbs qoyulub.

Xeberinfo.com:   Onların arasında Smolenskdə Ulyukayevə məxsus bir mənzil və 10 torpaq sahəsi də var.

Keçmiş nazirin Krımda daha 5 torpaq sahəsi və 161 kvadratmetrlik mənzilinin olduğu bildirilir.

Ulyukayev bu il noyabrın 15-də rüşvət ittihamı ilə həbs olunub. Onun «Rosneft»dən 2 milyon dollar rüşvət aldığı iddia edilir.

İddiaya görə, o, bu pulu «Başneft» şirkətinin dövlət səhmlərini ala bilmək üçün «Rosneft»ə müsbət rəy verməsi müqabilində alıb.

Maraqlıdır ki, Ulyukayev «Rosneft»in başqa bir dövlət neft şirkəti olan «Başneft»in səhmlərini almasının əleyhinə idi. O, hökumətə bu məsələni başqa variantlarla həll etməyi təklif etmişdi.

Üstəlik «Rosneft»lə bağlı bütün işlər hökumət səviyyəsində və ölkənin birinci şəxsinin də razılığı əsasında yekunlaşandan sonra Ulyukayevin adıçəkilən şirkətdən hansı əsasla rüşvət istədiyi də açıq qalan suallar arasındadır.

Rusiyalı ekspertlər arasında Ulyukayevin həbsini maraqlı tərəflərin «Rosneft» uğrunda savaşının tərkib hissəsi kimi qiymətləndirənlər də var, ABŞ-da respublikaçı Donald Trampın qələbəsindən sonra bu vaxta qədər Rusiyada əsasən demokratların «qanadı» altında mövcud olan liberalların şəbəkəsinin sıradan çıxırılması kimi görənlər də.

Ulyukayevin həbsindən təxminən 2 həftə sonra onun yerinə Rusiya maliyyə nazirinin müavini Maksim Oreşkin təyin edildi.

Ulyukayevdən fərqli olaraq Oreşkin «Rosneft»in özəlləşdirilməsi təşəbbüsünü aktiv şəkildə dəstəkləyənlərdi və hökuməti də məhz bu mövqe qane edirdi.

Onu da qeyd edək ki, saxlanandan bir neçə gün sonra keçmiş nazirin həbs cəzası ev dustaqlığı ilə əvəz olunub.