“Mənimlə qəsdi-qərəzliyi var idi. Ona görə də mənim balamı öldürdü”.

Xeberinfo.com:   Məlumata görə, bu sözləri Beyləqanda öz atası tərəfindən boğazı kəsilərək qətlə yetirilən Ümid İsgəndərovun anası Mahirə Abışova deyib.

Onun sözlərinə görə, keçmiş həyat yoldaşı hadisədən bir gün öncə onlara zəng edərək təhqir edib. Lakin uşağını danışmağa qoymayıb. “Telefonu əlindən aldı. Ağzını açanda söyüş söyür deyə mən telefonu bağladım”.

Qadın aildə yaranmış münaqişyə görə, 2 aydan çoxdur ki, iki oğlunu da götürərək atasının Beyləqan rayonunda məskunlaşdığı evə gedib.  Daha sonra həyat yoldaşı Zahid İsgəndərov övladlarını zorla ondan alıb. Kiçik oğlu balaca olduğundan anasına qaytarsa da, Ümid İsgəndərov atası ilə qalıb.

Mahirə Abışova Zahid İsgəndərovla 8 il əvvəl ailə qurub.

M. Abışova APA-ya açıqlamasında isə deyib ki, evləndiyi ilk gündən əri tərəfindən döyülüb, fiziki zorakılığa məruz qalıb: “İki ay əvvəl atamın evinə gəldik. Burda onunla yenə dalaşdıq. O, içki içirdi, tüfeyli həyat sürürdü. Bu səbəbdən onunla qayıtmadım. Sonra gəldi, uşaqların ikisini də oğurladı. 3 yaşlı kiçik oğlumu saxlaya bilmədiyi üçün geri qaytardı. Amma Ümidi vermədi”.

M. Abışovanın dediyinə görə, Z. İsgəndərov oğlunu meşəyə apararaq, orada başını kəsib. Daha sonra törətdiyi cinayəti həmkəndlilərinə xəbər verərək qaçıb. Qadına bu barədə xəbəri polislər verib. Gecə Beyləqan rayon Polis Şöbəsinin əməkdaşları ailənin təhlükəsizliyini təmin etmək məqsədilə evlərinin ətrafında keşik çəkiblər.

***

***

Beyləqan rayonunda 6 yaşlı övladının boğazını kəsərək onu qətlə yetirməkdə şübhəli bilinən şəxs yaxalanıb. Zahid İsgəndərov Ağcabədi rayonu ərazisində tutulub. O, Beyləqan rayonuna gətirilib və törətdiyi əməli etiraf edib.

***

Beyləqanda dəhşətli qətl hadisəsi baş verib. Rayon Polis Şöbəsindən verilən məlumata görə, hadisə rayonun Yuxarı Kəbirli kəndində qeydə alınıb. Kənd sakini Zahid İsgəndərov 6 yaşlı oğlu Ümidin boğazını kəsərək qətlə yetirib. Z. İsgəndərov hadisəni törətdikdən sonra qaçıb. Hazırda onun tutulması istiqamətində əməliyyat-axtarış tədbirləri davam etdirilir.

İlkin məlumata görə, hadisə ailədaxili münaqişə zəminində törədilib.

Qətlə yetirilən Ümid 1-ci sinifdə oxuyurmuş.

Faktla bağlı Beyləqan Rayon Prokurorluğu tərəfindən Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, istintaq gedir