Prezident İlham Əliyevin Nazirlər Kabinetinin iclasında manatın devalvasiyasından istifadə edərək qiymətləri süni şəkildə artıranlara qarşı sərt tədbirlərin görülməsinə dair göstərişindən sonra hüquq-mühafizə orqanlarının bəzi həbslər həyata keçirdiyi haqda xəbər vermişdik.

Xeberinfo.com:   Xatırladaq ki, qiymətləri süni şəkildə artırmağa görə həbs edilənlər arasında bəzi əczaçılıq firmalarının rəhbərləri və menecerləri, o cümlədən “Alfamed” MMC adlı firmanın rəhbərləri də vardı. Baş prokurorluq yanında korrupsiyaya qarşı mübarizə Baş idarəsinin yaydığı məlumatda deyilirdi ki, bu firmanın “Grateziano” adlı dərman vasitəsini dəyərindən dəfələrlə artıq qiymətə satması müəyyən edilib.

Virtualaz.org saytı bu faktlardan çıxış edərək Azərbaycanda əsasən onkoloji xəstəliklərə və heptaitə qarşı dərmanların “qara bazarı” barədə araşdırma aparmışdı. Həmin araşdırmada əczaçılıq sektorundakı mənbələrdən əldə edilmiş məlumatlara əsasən göstərilirdi ki, “Alfamed” MMC əsasən hepatitə və onkoloji xəstəliklərə qarşı dərmanların ölkəyə qeydiyyatsız gətirilib satılmasını həyata keçirib. Və bu firmanın faktiki sahibi kimi Ədalət Ramazanov adlı iş adamı göstərilirdi.

Eyni zamanda bu firma ətrafında araşdırmalarımız davam edirdi və nəhayət son həbslərə qədər əczaçılıq bazarında faktiki olaraq tanınmayan “Alfamed”in fəaliyyətinə dair bəzi sənədləri əldə etmək, araşdırmada əksini tapan məlumatlarla bağlı qarşı tərəflə də dəqiqləşdirmələr aparmaq mümkün oldu.

Firmanın icraçı direktoru Kübra Əliyevadan əldə etdiyimiz məlumatlar və sənədlər göstərir ki, “Alfamed” MMC-in əsas fəaliyyəti “Grateziano”  dərman vasitəsinin Azərbaycana qanuni idxalı və satışı ilə bağlı olub. Bu dərman 2015-ci il iyunun 16-da Səhiyyə Nazirliyi tərəfindən qeydiyyata alınıb. (Qeydiyyat nömrəsi: 15-00810).

Bəs “Grateziano” nə dərmandır və heptatit-C virusuna qarşı nə dərəcədə effektivdir?

Həmin dərman ABŞ-da icad edilib və olduqca bahalıdır, lakin heptatit-C xəstəliyinin kütləvi yayıldığı Misirdə dərmanın əlçatan qiymətə istehsalı ilə məşğul olan zavod fəaliyyət göstərir. İnternet mənbələrində apardığımız araşdırmalar da təsdiq edir ki, az qala hər iki nəfərdən birinin bu dəhşətli virusa yoluxduğu Misirdə həmin dərmanın tətbiqi sayəsində heptatit-C epidemiyasını cilovlamaq mümkün olub. Ötən il Misir prezidenti, general əl-Sisi həmin dərman sayəsində heptatit-C epidemiyasına qalib gəldiklərini elan etmişdi. Və Misirdə istehsal edilən dərman MDB respublikalarında da yayılıb. MDB respublikalarından həmin dərmanı almaq üçün Misirə gedənlərin sayı artmaqdadır.

“Grateziano” pereparatının Azərbaycanla yanaşı bəzi MDB respublikalarında (Ukrayna, Belarus, Qazaxıstan) qeydiyyatdan keçməsi isə “Alfamed”in nümayəndəsinin bildirdiyi kimi, bu firmanın hazırda həbsdə olan təsisçisi, tibb professoru Əfqan Xudaverdiyevin sayəsində baş tutub.

“Alfamed” MMC-nin nümayəndəsi bildirir ki, indiyə qədər Azərbaycanda heptatit-C virusuna yoluxmuş təxminən 1300 xəstə  “Grateziano” dərmanı ilə müalicə olunub və sağalıb. Və bu dərmanın nə qiyməti, nə keyfiyyəti barədə şikayətlər daxil olmayıb.

Məlum olub ki, əvvəllər həmin dərman Azərbaycanda 5000-7000 dollara satılırdı. Lakin Ə.Xudaverdiyevin bu dərmanı bəzi MDB respublikalarında qeydiyyatdan keçirməsini nəzərə alan Misir şirkəti Azərbaycana dərmanı xüsusi güzəştli qiymətə satmağa başlayıb.

Manatın devalvasiyasından əvvəl dərman Azərbaycanda 550 dollara satılırdısa devalvasiyadan sonra bundan da aşağı qiymətə və manatla satılıb. Məsələ ondadır ki, “Grateziano” qiyməti Tarif Şurası tərəfindən tənzimlənən dərmanlar sırasında da deyil. Bu baxımdan firma süni qiymət artımı barədə ittihamları qəbul etmir.

Qeyd olunduğu kimi “Alfamed” MMC Azərbaycanın əczaçılıq bazarında ciddi paya malik olan firma deyil. Bu firmanın cəmi 7-8 adda dərman vasitəsinin idxalı və satışı ilə məşğul olduğu dəqiqləşib. Səhiyyə Nazirliyinin Dərman Vasitələrinin Analitik Eskpertiza Mərkəzi firmanın idxal etdiyi bu dırman vasitələrinin hamısını müvafiq ekspertizadan keçirib və uyğunluq sənədi verib.

Və onu da dəqiqləşdirdik ki,  firma hazırda maliyyə baxımından böhran vəziyyətindədir və faktiki olaraq müflis olub. “Alfamed” MMC “Accesbank”dan  250 min dollar kredit götürüb və borcun bir hissəsini qaytara bilməyib. Vergilər Nazirliyi ötən ilin dekabrında firmada cari yoxlama keçirib və hər hansı pozuntu aşkarlamayıb.

Firmanın əsl sahibinin Ədalət Ramazanov olması barədə deyilənlərə gəldikdə isə “Alfamed” MMC-nin nümayəndəsi bildirib ki, bu iş adamının firma ilə heç bir formal bağlılığı yoxdur. Doğrudur, Ə.Ramazanovun qohumu və dostu bu firmada işləyib, ancaq o nə firmanın təsisçisi, nə səlahiyyətli şəxsi deyil. Bunu firmanın redaksiyamıza təqdim edilən təsis sənədləri də sübut edir.

Bəs həmin Ə.Ramazanov kimdir? Azərbaycanda hansı biznes fəaliyyəti var, yaxud olub? Araşdırmalarımız nəticəsində məlum oldu ki, Ə. Ramazanov Rusiya vətəndaşıdır, onun Azərbaycanda hansısa biznes aktivləri, o cümlədən tikinti şirkəti, avtomobil satışı biznesi , iddia edildiyi kimi, Türkiyədə əczaçılıq zavodları yoxdur. Ə.Ramazanovun yaxınlarından dəqiqləşdirə bildik ki, bir müddət Azərbaycana dönüb burada iş qurmaq imkanlarını araşdıran, ancaq daha sonra yenidən Rusiyaya dönən bu iş adamının  hazırda müxtəlif ağır cinayətlərdə ittiham olunan bir sıra keçmiş məmurlarla (MTN-dəki mütəşəkkil qruplaşma nəzərdə tutulur.-red) bu və ya digər formada bağlılığı da olmayıb. Habelə onun Azərbaycan gömrüyündə brokerlik fəaliyyəti ilə məşğul olduğuna dair deyilənlər öz təsdiqini tapmır...