Xarici KİV-in məlumatına görə, «Avropa-1» radiosuna verdiyi müsahibədə Fransanın xarici işlər naziri Loran Fabius bəyan edib ki, Tehranın nüvə proqramı üzrə İranla «altılıq» arasında aparılan danışıqlar əsasında əldə olunmuş razılaşma bütün tərəflər üçün sərfəlidir.

"Xeberinfo.com":   Məlumata görə, nazir xəbər verib ki, yaxın vaxtlarda İrana səfər etmək niyyətindədir (TASS).

«İranın nüvə proqramı üzrə razılaşma bütün tərəflər üçün əlverişlidir. Əks təqdirdə, belə bir razılaşmanı əldə etmək sadəcə, mümkün olmazdı. Bu razılaşma İran üçün ikiqat sərfəlidir. Birincisi, ona qarşı tətbiq olunan xeyli ağır sanksiyalar aradan götürülür, hələlik müəyyən şərtlər daxilində. İkincisi, İran indi beynəlxalq cəmiyyətə qayıtmağa ümid edə bilər» – deyə, Fabius izah edib.

Xəbər verildiyi kimi, çərşənbə axşamı İran və beynəlxalq «altılıq» İran İslam Respublikasının nüvə proqramının tənzimlənməsi üzrə aparılan çoxillik danışıqlar marafonunu başa vurub və razılaşma əldə edib. Nəticədə, hərtərəfli birgə fəaliyyət planı üzrə razılıq əldə olunub. Plan əsas sənəddən və 5 texniki əlavədən ibarətdir. Bundan başqa, bəyannamə layihəsi də razılaşdırılıb. Bəyannamə, danışıqların bütün iştirakçıları tərəfindən (həmmüəllif olaraq) müzakirə olunmaq üçün Birləşmiş Millətlər Təşkilatı Təhlükəsizlik Şurasına təqdim ediləcək.

AzPolitika.info