AZ
RU
.jpg)
TƏNHA ÇİÇƏYƏM
Xeberinfo.com:
Sən getdin, mən hönkür-hönkür ağladım,
Ümidimi sənsizliyə bağladım,
Həsrət cəkib, öz içimi dağladım,
Allahım, nə qədər qəmli taleyəm,
Çöldə yetim qalmış tənha çiçəyəm.
Baxışlarım, bu dünyadan gen oldu,
Gedişin saçımda vaxtsız dən oldu,
Nə oldusa mənə sevgidən oldu,
Bəlkə, qəfil əsən dəli küləyəm?
Çöldə, yetim qalmış tənha çiçəyəm.
Yaşamaq həvəsim öldü bir anlıq,
Kədər gözlərimdə güldü bir anlıq,
Tək mənə xatirən qaldı bir anlıq,
Bu həyatla nə barışam, nə deyəm?
Çöldə, yetim qalmış tənha çiçəyəm.
Ömrümü, günümü qaraltdı bu eşq,
Vüsalı gözümdə saraltdı bu eşq,
Məni cavan ikən qocaltdı bu eşq,
Indi sınıq sazam, ya qəmli neyəm.
Çöldə, yetim qalmış tənha çiçəyəm.
Zeynəbəm, nə fərqi yaşayım, ölüm,
Bütün ömrüm boyu, çəkirəm zülüm,
Nə bir ocağım var, nə sönmüş külüm,
Əzablar əlində sanki dəliyəm.
Çöldə, yetim qalmış, tənha çiçəyəm.
ZEYNƏB DƏRBƏNDLİ
