İranda vurulan İsrail təyyarəsinin Naxçıvandan qalxdığı iddia olunur

   Rəsmi Tehran qarşı tərəfi hədələyərək, «cavabımız diplomatik olmayacaq» bəyanatını verdi

   "Xeberinfo.com": İran ordusunun baş qərargah rəisinin müavini Məsud Cəzayeri deyib ki, Israilin pilotsuz təyyarəsini vurublar və həmin pilotsuz təyyarə “Iranın şimalındakı keçmiş sovet respublikasından” havaya qalxıb: “Təyyarəni Qüdsdəki işğalçı rejimlə əməkdaşlıq edərək Irana göndərən ölkənin öz səhv hərəkətini etiraf etməsini gözləyirik, əks halda, onun adını çəkəcəyik”.

Pilotsuz təyyarənin Natanzdakı nüvə obyekti yaxınlığında vurulduğu deyilir. Islam Inqilabı Keşikçiləri korpusunun generalı Hüseyn Salami deyib ki, pilotsuz təyyarə nüvə obyektinə çatmamış vurulub, onlar həmin pilotsuz təyyarənin bir neçə gün əvvəl hansı ölkənin hansı bazasından qalxdığını bilirlər.

Salami deyib ki, İsrail istehsalı olan, radardan yayına bilən “Hermes” markalı pilotsuz təyyarəni Iran hava məkanına girən kimi izləməyə başlayıblar, hansı missiyanı yerinə yetirəcəyini izləmək istədikləri üçün dərhal vurmayıblar. Iran tərəfi bildirir ki, sözügedən markadan olan pilotsuz təyyarə bir dəfə yanacaq doldurmaqla 1600 kilometr məsafəyə uça bilir. Yüksək dəqiqliyə malik fotolar çəkə bilən 2 fotokamera ilə təchiz edilib.
Iran bildirir ki, bu, avqustun 25-də vurduğu pilotsuz təyyarənin qalıqlarıdır.

İsrail mətbuatında isə pilotsuz təyyarənin havaya qalxdığı ölkə kimi, Azərbaycanın adı hallandırılıb. Israilin kəşfiyyat xidməti “Mossad”a yaxınlığı ilə tanınan “Debkafile” saytı ÿxəbər verir ki, Iranda vurulan təyyarə həqiqətən “Hermes 450"dir və Azərbaycanın Naxçıvan bölgəsində yerləşən aviabazadan qalxıb. Sayt məlumatı Israil hərbi qaynaqlarından və Irandakı mənbələrdən əldə etdiyini yazır.

“Debka” Naxçıvanın Iran, Türkiyə və Ermənistanla həmsərhəd olduğunu, üç il əvvəl Azərbaycanın Israildən aldığı “Hermes 450" təyyarəsini Qarabağda kəşfiyyat aparmaq üçün istifadə etdiyini, ancaq təyyarənin vurulduğunu bildirir.

Sayt onu da qeyd edir ki, Iran iki ildir bu pilotsuz təyyarələri vurmağa, yaxud elektron vasitələrlə endirməyə çalışırdı, ancaq uğur əldə edə bilmirdi. Bu həftə baş verən insident isə istisnadır. Iran təyyarəni yer-hava raketi ilə vurub: “Iran təyyarənin stels texnologiyasına malik olduğunu deməklə bu uğursuzluğunu ört-basdır etməyə çalışır. Əslində isə təyyarə stels texnologiyasına malik deyil və Naxçıvandan qalxandan sonra Iranın hava məkanında 300 kilometr irəliləyib, yalnız bundan sonra hava hücumundan müdafiə sistemləri tərəfindən aşkarlanıb”.

Azərbaycanın Müdafiə Nazirliyi isə iddiaları təkzib edir. Nazirliyin mətbuat xidmətinin rəhbəri Vaqif Dərgahlı “virtualaz.org”a açıqlamasında bəyan edib ki, İsrail istehsallı “Hermes 450" tipli pilotsuz kəşfiyyat təyyarəsinin Azərbaycan ərazisindən buraxıldığı barədə yayılan məlumatlar təxribat xarakterlidir.
Vaqif Dərgahlının fikrincə, belə təxribat xarakterli məlumatlar Azərbaycanın qonşuları ilə münasibətlərini korlamaq məqsədilə yayılıb: “Bu tipli pilotsuz uçuş aparatları Azərbaycan Respublikasının Silahlı Qüvvələrinin silahlanmasında yoxdur. Bu təxribat xarakterli informasiyanı təkzib edir və bildiririk ki, yayılan məlumatları yaxın qonşularla münasibətlərin korlanmasına cəhd kimi qiymətləndiririk”.

Məsələyə münasibət bildirən Prezident Administrasiyası ictimai-siyasi məsələlər şöbəsinin müdiri Əli Həsənov da “virtualaz.org”a deyib ki, bu, bəzi xarici dairələrin Azərbaycana qarşı növbəti təxribatıdır: “Işğalçı Ermənistan istisna olmaqla Azərbaycan bütün qonşuları ilə öz münasibətlərini qarşılıqlı etimad, səmimilik, dostluq, bir-birinin daxili işlərinə qarışmamaq prinsipləri üzərində qurub. Bu ilin aprelində prezident Ilham Əliyevin Iran Islam Respublikasına rəsmi səfəri yüksək səviyyədə keçib, qonşu ölkənin rəhbərləri ilə görüşlərdə ikitərəfli münasibətlər kompleks şəkildə müzakirə olunub, əvvəlki dövrdə mövcud olan bütün problemlərə aydınlıq gətirilib və sual doğura biləcək heç bir məqam qalmayıb. Görünür, belə vəziyyət bəzi xarici dairələri narahat edir və bu tipli informasiyalar Azərbaycanın qonşuları ilə, o cümlədən Iranla münasibətlərini korlamaq üçün bilərəkdən dövriyyəyə buraxılır. Birmənalı şəkildə bildirirəm ki, Azərbaycan üçün dost Iran dövlətinin ərazisində xüsusi maraq kəsb edən, axtaracağı heç bir şey yoxdur və bu informasiya növbəti təxribat cəhdindən başqa bir şey deyil”.