“2 yaşlı bir uşağın qətl edilməsi əsla qəbul ediləcək bir şey deyil.  Heç bir savaşda uşaqlar, qadınlar və yaşlılar müharibənin iştirakçısı olmur. Ən ağır silahlarla həyata keçirilən müharibələrdə belə, uşaqlar müharibədən kənarda olur”.

Yenixeber.org:   Bu sözləri 2 yaşlı Zəhranın qətlə yetirilməsi olayına münasibət bildirən Türkiyə Böyük Millət Məclisinin (TBMM) deputatı, Türkiyə-Azərbaycan parlamentlərarası dostluq qrupu rəhbəri Necdət Ünüvar deyib. O, Modern.az-a açıqlamasında bildirib ki, belə vəhşiliklər ermənilər tərəfindən dəfələrlə həyata keçirilib.

“Füzulidə 2 yaşlı bir körpəmiz şəhid oldu, həyatını itirdi. Bunu şiddətlə qınayıram. Bu ermənilər tərəfindən ilk dəfə həyata keçirilən əməl deyil. 25 ildən çoxdur Qarabağda, Xocalıda, fərqli nöqtələrdə ermənilərin törətdiyi uşaq qətliamlarının şahidi olmuşuq. Bu vəhşilikdir, bunu insanlığa yaraşdıra bilmirəm. Bu, Ermənistan ordusunun keçmişdə də tez-tez etdiyi əməllərdən növbətisidir. Keçmişdə də Xocalı ətrafında, Dağlıq Qarabağın işğal altındakı torpaqlarında buna  bənzər hadisələr yaşandı. 2 yaşında deyil, hətta körpələrin ana qarnında qətl edildiklərinin şahidi olduq.

Təəssüf ki, dünya belə mövzulara çox diqqətsiz yanaşır, görməzlik edir. Amma bunun nə qədər davam edəcəyini qəbul etmək mümkün deyil.

Bu məsələ ilə bağlı Türkiyə Xarici İşlər Nazirliyi bəyanat verdi. Hadisəni şiddətlə qınadığını ifadə etdi. Olay dünyanın fərqli platformalarında gündəmə gətiriləcək. Biz də mövzuları gündəmə gətirməyə davam edəcəyik.

Həm 2 yaşlı yavrumuzun, həm də onun nənəsininin ölümünə çox üzüldük. Allah onlara rəhmət etsin, məkanları cənnət olsun. Azərbaycanın başı sağ olsun. Biz hər zaman Azərbaycanın yanındayıq”.