ABŞ Ədliyyə Nazirliyi Trampın miqrasiya fərmanına dəstək verib. Və Apellyasiya Məhkəməsini sənədin qüvvəyə minməsi barədə qərar verməyə çağırıb.

Xeberinfo.com:  Nazirlikdən onu da bildiriblər ki, dairə məhkəməsi fərmanın icrasına qadağa qoymaqla səhvə yol verib.

«Prezident ölkənin təhlükəsizliyi ilə bağlı qərar qəbul edə bilər. Bu qərarı müsəlmanlara qadağa kimi qiymətləndirmək yanlışdır. Fərmanın şamil olunduğu 7 ölkə onlardan gələ biləcək terror təhlükəsinə görə seçilib. Fərman dinə qarşı münasibətdə neytral mövqe tutub», – deyə Ədliyyə Nazirliyindən yayılan bəyanatda bildirilir.

Xatırladaq ki, fevralın 3-də Sietl şəhərinin federal hakimi bütün ABŞ ərazisində prezident Trampın növbəti 90 gün ərzində yeddi müsəlman ölkəsindən (Suriya, Sudan, Somali, İraq, İran, Liviya və Yəmən) olan bütün immiqrantların və qonaqların ABŞ-a gəlməsinin müvəqqəti qadağan edilməsi barədə fərmanının qüvvəsini müvəqqəti dayandırıb.
Həmin qərara əsasən, yuxarıda adları çəkilən yeddi müsəlman ölkəsindən olanlara əvvəlcə verilmiş, lakin Trampın məlum fərmanından sonra ləğv edilmiş vizalar bərpa olunmalıdır.
Tramp administrasiyası hakimin qərarından apellyasiya şikayəti verib.
Apellyasiya Məhkəməsinin qərarı sabah elan olunacaq.