Yanvarın 25-i Ermənistanın baş naziri Nikol Paşinyan Moskvaya səfər etdi. Onun Rusiya prezidenti Vladimir Putinlə görüşəcəyi gözlənilsə də, Paşinyan öz həmkarı Dmitri Medvedevlə bir araya gəldi. Kremlin sözçüsü Dmitri Peskov isə məsələyə belə aydınlıq gətirdi ki, Putinlə Paşinyan mütəmadi olaraq telefonda danışır, müzakirələr aparır. Buna görə də onların görüşməsi üçün lüzum yoxdur.

Yenixeber.org: Politoloq Tofiq Abbasov isə məsələ ilə bağlı açıqlamasında bildirdi ki, Rusiyanın həm tələbləri, həm təklifləri, həm də şərtləri var deyə Nikol Paşinyan aparıcı mövqedə olmasına baxmayaraq, Moskvanın ismarıclarını layiqincə cavablandıra bilmir:

“Onun demək olar ki, tam formalaşmış münasibəti, əks-təklifləri, əks hərəkətləri yox səviyyəsindədir. O, real diskussiya, fikir mübadiləsi üçün hələ yetişməyibsə, nəyə görə Putin onu qəbul etməlidir? Əslində, protokol tələbləri nöqteyi-nəzərindən hökumət başçısı olan Paşinyan tərəf müqabili olan Dmitri Medvedevlə görüşməlidir. Son səfərində belə də oldu. Bu baxımdan, protokol qaydaları anlaşılandır. Digər tərəfdən, əgər söhbət strateji məqamlardan, gündəmdə olan əsas problemlərin həllindən gedirsə, ola bilsin ki, prezidentlə baş nazir görüşsün. Amma həmin o görüşlərə görə baş nazir tam hazır şəkildə səfər etməli, bu və ya digər problemlə bağlı özünün mövqeyini aydınlaşdırmalıdır. Təkliflərinin olduğunu müəyyən etməlidir. Son olaylardan sonra belə başa düşürəm ki, Nikol Paşinyan hələ bu hazırlıq səviyyəsinə gəlib çıxmayıb. Onun bir çox problemlərdə açıq aşkar acizliyi və qətiyyətsizliyi özünü biruzə verir. Düşünürəm ki, Paşinyanın protokol üzrə keçirdiyi görüşlərlə bağlı informasiyalar Vladimir Putinə çatdırılır.

Ermənistanın hazırkı prezidenti Armen Sərkisyan daha təcrübəli siyasətçidir. O, hazırda qanunverici orqana rəhbərlik edir. Məhz prezidentin problemlərin həlli bağlı ideyaları və fikirləri olarsa, Putin onu qəbul edər. Onların arasındakı danışıqlar nəticəsində də razılıq əldə oluna bilər. Ermənistanın idarəetmə sisteminə görə, daha çox məsuliyyət, səlahiyyət məhz parlamentli respublikanın rəhbəri Nikol Paşinyanın üzərinə düşür. Buna görə də hamı problemlərlə bağlı qərarları bu şəxsdən gözləyir”.