ABŞ prezidenti Donald Tramp Fransanın paytaxtı Parisdə baş qaldıran etiraz aksiyalarına reaksiyasını bildirib.

Yenixeber.org: Prezident bu barədə tvitter səhifəsində yazıb.

Tramp Parisdə yanacaq vergilərinin aşağı salınması və iqtisadi şərtlərin yaxşılaşdırılması aksiyaları ilə ölkəsinin Paris İqlim Müqaviləsindən çıxması arasında bağlantı qurub:

“Dostum Emmanuel Makron (Fransa prezidenti – red.) və aksiyaçılar mənim iki il əvvəl qənaətinə gəldiyim nəticə üzərinə razılaşdıqları üçün məmnun oldum. Paris Razılaşması ölümcül hal aldı. Çünki ölkələr enerji qiymətlərini artırarkən təbiəti çirkləndirənləri təmizə çıxarır”.

Qeyd edək ki, Fransada 17 noyabrda başlayan etiraz aksiyaları son illərin ən şiddətli küçə nümayişinə çevrilib. Etirazçılar prezidentdən vergiləri aşağı salmasını və iqtisadi həyat şərtlərini yaxşılaşdırmasını tələb edir. Artıq nümayişlər nəticəsini verməyə başlayır. Belə ki, Fransanın baş naziri vergilərlə bağlı edilən dəyişiklilərin 6 ay müddətinə təxirə salındığını açıqlayıb.

Xatırladaq ki, Donald Tramp ötən ilin aprel ayında verdiyi açıqlamada ABŞ-ın Paris İqlim Müqaviləsindən çıxması qərarını açıqlamışdı.