Millət vəkili Qənirə Paşayeva Kırşəhər bələdiyyəsinin dəvəti ilə “Türk dünyasının ağır problemləri və birliyin önəmi” adlı konfransda iştirak edib.

Yenixeber.org: Konfransda çıxış edən millət vəkili Qarabağ və türk dünyası həqiqətlərinin dünyaya geniş miqyasda yayılması üçün birliyin daha da gücləndirilməsi lazım olduğunu bildirib. Millət vəkili Ermənistanın Azərbaycan torpaqlarının 20 faizini işğal altında saxlamasından, onların törətdiyi vandalizm aktlarından, Xocalı soyqırımından geniş danışıb.

Qənirə Paşayeva qeyd edib ki, gənclər hazırda əsas təbliğat vasitələrindən olan sosial mediada, virtual aləmdə fəal olmalı və qondarma erməni soyqırımı iddialarına qarşı mübarizədə, Azərbaycan həqiqətlərinin daha geniş şəkildə yayılmasında bu vasitələrdən istifadə etməlidir.

Tədbirin sonunda Kırşəhər rəsmiləri, bələdiyyə başqanı köməkçisi Əmrə Şahinçi çıxış edərək millət vəkili Q.Paşayevaya təşəkkürlərini bildirib və bu cür konfransların gənclər üçün böyük önəmini vurğulayıb.

Q.Paşayeva tədbir iştirakçılarına Türkiyədə yeni çapdan çıxmış “Turan yolçusu” və “Eşq yolçusu” kitabını hədiyyə edib.