Abşeron Rayon Polis Şöbəsinin xidməti işlər üzrə rəis müavini, polis polkovnik leytenantı Oqtay Süleymanlı tutduğu vəzifədən azad edilib və sərəncama göndərilib. 

"Xeberinfo.com": Məlumata görə, Abşeron Rayon Polis Şöbəsinə yeni təyin edilən rəis Şəhriyar Şəmşirli bir müddət öncə keçirdiyi toplantıda Qeydiyyat dəftərinin gizlədilməsindən narahatlığını bildirmişdi və müavininə işləri təhvil verməsi üçün 10 gün möhlət tanımışdı. Hazırda möhlət tamam olub və yeni rəis sözünün üstündə duraraq, müavini işdən azad edib. 

Abşeron RPŞ-nin Təhqiqat idarəsinin rəisi Yusif Vəkilov isə yaşı ilə əlaqədar istefaya göndərilib. 

Abşeron Rayon Polis Şöbəsindən isə Axar.az-a bildirildib ki, polis polkovnik-leytenantı Oqtay Süleymanlı işdən qovulmayıb, sadəcə, məzuniyyətə göndərilib. O.Süleymanlının nə vaxt məzuniyyətdən qayıdacağı və işə başlayacağı ilə bağlı sual isə cavabsız qaldı. 

Qeyd edək ki, Şəhriyar Şəmşirlinin Abşeron rayonuna yeni təyinat almasının ardınca keçirdiyi ilk toplantıda qalmaqal yaşanmışdı. Məlum olmuşdu ki, şöbənin qeydiyyat dəftəri və qeydiyyat sənədlərindən bəziləri “itib”. 

Bu “itkini” hansısa neqativ əməllərin ört-basdır edilməsi və gizlədilməsi kimi dəyərləndirən yeni rəis isə sənədlərin dərhal üzə çıxarılmasına göstəriş vermişdi. 

Hazırda qeydiyyat dəftərinin və sənədlərin artıq “tapıldığı” da bildirilir. 

Xatırladaq ki, Şəhriyar Şəmşirli bundan əvvəl Xaçmaz rayonunun polis rəisi işləyib. O, “Azəryolservis” ASC-nin sədri Cavid Qurbanovun qardaşı, Azərbaycanın klassik və məşhur aşığı Dədə Şəmşirin nəvəsidir.