“Bu ilin sonunadək tələbələrin bir ali məktəbdən digər ali məktəbə köçürülməsinin elektron sistemi yaradılacaq”.

Xeberinfo.com:   “Report”un məlumatına görə, bunu jurnalistlərə açıqlamasında təhsil naziri Mikayıl Cabbarov deyib.
Nazirin sözlərinə görə, bu sahədə bir neçə il əvvəl qeyri-şəffaf hallara rast gəlinirdi: “Bu da əhalinin, tələbələrin haqlı narazılığına səbəb olurdu. Meyarların, qaydaların aydın şəkildə tətbiq edilməsi, eləcə də elan edilməsində əsas məqsəd məhz insan faktorundan asılılığın aradan qaldırılması idi. Tələbə-universitet- təhsil sistemi münasibətlərinin sağlamlaşdırılması, şəffaf səviyyəyə çatdırılması üçün hazırda biz bu işin elektron platform üzərindən həyata keçirilməsini hazırlayırıq. Hesab edirəm ki, bu iş yaxın zamanda yekunlaşacaq”.
M. Cabbarov qeyd edib ki, indi bu və ya digər tələbənin köçürülmə prosesi insan müdaxiləsi olmadan, tələbənin digər ali məktəb və fakültəyə keçmə hüququna malik olub-olmaması meyarları əsasında həyata keçiriləcək: “Meyarlarda köklü dəyişikliklər etməyi nəzərdə tutmuruq. Müəyyən dəyişikliklər olacaq ki, bunun da cüzi xarakter daşıya biləcəyi istisna edilmir. Təbii ki, burada söhbət kordinal dəyişikliklərdən getmir. Tələbə köçürülmələri istiqamətində son 3 ildə böyük işlər görülüb. Bu proses tam şəffaflaşmış meyarlara əsasən həyata keçirilir. Tələbələrin qəbul imtahanlarında topladıqları ballar əsas götürülərək onların ixtisaslarının uyğunluğunu saxlamaqla, hər kəs üçün bu prosesin daha da şəffaf olması səbəbindən prosesin elektronlaşdırılması bu istiqamətdə növbəti addım olacaq”.