ANS telekanalında verilişlərin bağlanması davam edir. 

Xeberinfo.com:   Məlumata görə, ANS telekanalında “Şoubiz”, “İç Xəbər”, “İtibucaq” və “Düzbucaq” verilişləri bağlanıb.
Xəbərdə bildirilir ki, bu telekanal rəhbərinin şəxsi qərarıdır və bu verilişlərin yayımının dayandırılmasında Milli Teleradio Şurasının göstərişi olmayıb.
Qeyd edək ki, adıçəkilən verilişlər həftənin 6 günü yayımlanırdı.

ANS Şirkətlər Qrupunun prezidentinin media üzrə baş müşaviri Mais Məmmədov telekanalda eyni vaxtda dörd verilişin bağlanmasına aydınlıq gətirib.

ANS-in rəsmisi xəbəri təkzib etməyib:

“Bəli, bundan sonra ANS-də yayımlanan “İç xəbər” verilişi başqa adla təqdim olunacaq. Digər verilişlər barədə konkret bir söz deyə bilmərəm”.

M.Məmmədov onu da bildirib ki, növbəti adla nümayiş olunacaq verilişin formatında cüzi dəyişiklik nəzərdə tutulub:

“Müəyyən dəyişikliklər olacaq. Lakin yenə də tamaşaçı məktubları əsasında süjetlər hazırlanacaq, digər məsələlər də olduğu kimi qalacaq”.

Verilişin adının dəyişilməsinə gəlincə, M.Məmmədovun cavabı müəmmalı oldu:

“Bunu sizə deyə bilməyəcəm. Çünki qərar veriləndə orda iştirak etməmişəm”.