Dekbarın 4-də “Günəşli” yatağında baş vermiş qəza nəticəsində itkin düşmüş neftçilərin dünən aparılan axtarışları da bir nəticə verməyib.

Xeberinfo.com:   Xüsusi qərargahdan verilən məlumata görə, bu gün səhər saatlarından başlayaraq itkin düşmüş neftçilərin helikopter və gəmilərin köməyi ilə axtarışları yenidən bərpa edilib.
Qərargahdan qeyd ediblər ki, platformada hələ də davam edən yanğının söndürülməsi istiqamətində də işlər davam etdirilir.

“Ötən gün Fövqəladə Hallar Nazirliyinin (FHN) 4 helikopteri, dalğıclar və gəmilər axtarış aparıblar. Bu gün də FHN-nin iki helikopteri axtarışlara başlayıb. Daha iki helikopter axtarışa qoşulacaq. "Azərbaycan Hava Yolları" (AZAL) QSC-nin helikopteri həm neftçiləri platformalara daşıyır, həm də axtarışlarla məşğul olur.
Helikopterlər sahillərdə də axtarışlar aparırlar. Əgər neftçilər sahilə çıxıbsa o zaman onları da görmək mümkün olacaq". 

Qərargahdan verilən məlumata görə, Azərbaycan tərəfinin xahişi ilə Xəzəryanı dövlətlərin Sərhəd Xidmətləri də axtarışlar aparır. 
Hələlik yanğın söndürülməyib. 

Xatırladaq ki, dekabrın 4-də saat 17:40 radələrində güclü tufan nəticəsində “Günəşli” yatağındakı 10 saylı dərin dəniz özülündə yüksək atmosfer təzyiqi ilə işləyən sualtı qaz xəttinin dayaq borusu qırılmış, boru kəməri zədələnmiş və yanğın baş vermişdir. Xilasetmə əməliyyatı nəticəsində 33 nəfər xilas edilib. Hazırda 23 nəfərin axtarışı davam etdirilir.