Bu gün səhər saatlarında Vladimir Putinin əmri ilə Rusiya Ukraynaya qarşı irimiqyaslı əməliyyatlara başlayıb. Hazırda iki ölkə arasında şiddətli döyüşlər gedir. Ukraynanın müxtəlif şəhərlərində partlayış səsləri eşidilir.

Yenixeber.org: Ukraynadakı vəziyyət bir anda gərginləşdiyindən, Azərbaycan vətəndaşları çətin vəziyyətə düşüb. Xarkov şəhərində təhsil alan bir qrup azərbaycanlı tələbə sosial şəbəkə hesablarında yardım çağırışları ediblər.

Onlar Xarkovda minlərlə azərbaycanlı tələbənin çətin vəziyyətə düşdüyünü, şəhərdəki vəziyyətin çox pis olduğunu bildiriblər.

Tələbələr Azərbaycanın Xarkovdakı Konsulluğu ilə əlaqə qurularaq, “çarter” reyslərlə ölkəyə təxliyyə olunmlarını xahiş edirlər.

Azərbaycanın Xarkovdakı Konsulluğundan isə bildirilib ki, vətəndaşlarımız panikaya düşməsinlər və yalnız təsdiqlənmiş rəsmi məlumatlara istinad etsinlər.

Qeyd edək ki, qeyri-rəsmi məlumatlara görə, Ukraynada 300 minə yaxın azərbaycanlı yaşayır. Onlardan 20 minə qədərinin isə tələbə olduğu bildirilir.

Xatırladaq ki, əksər ölkələr bir neçə gündür öz vətəndaşlarına Ukraynadan təxliyyə etsə də, Azərbaycan XİN buna ehtiyac olmadığını, lazım olduğu halda təxliyyə prosesinə başlanıla biləcəyini bildirmişdi.