Gəncənin icra başçısı Elmar Vəliyev Qafqazın Şeyxinə qarşı həmləyə keçib

Xeberinfo.com:  Məlumata görə, Elmar Vəliyev Hacı Allahşükür Paşazadənin “İmamzadə” ziyarətgahındakı adamı olan axund Hacı Tahir Abbaszadəyə hücum etməklə Şeyxi bitirmək missiyasını yerinə yetirir. 

Gəncə “xanı”nın mənsub olduğu siyasi düşərgə A.Paşazadə əleyhinə kampaniya aparmaq istəyir. Məqsədin Şeyxin yerinə klanın öz adamını yerləşdirməkdir. 

Əvvəlcə, yüngül zərbə endirməklə - “İmamzadə” axunduna hücumla proses başlanır. Son hədəf isə Şeyxi devirməkdir. Onun ayağının altını qazan qüvvələr hərəkətə Gəncədən keçib. 

Qafqaz Müsəlmanları İdarəsinin sədri vəzifəsinə Gəncə icra başçısının təmsil olunduğu qruplaşmanın adamı təyin edilə bilər. İqtidar daxilindəki bu savaşın görünən tərəfi axunda hücum edilməsidir. 

Politika.Az-a daxil olan xəbərə görə, hakimiyyət içindəki bu qarşıdurmanın necə yekunlaşacağı sual doğurur. Şeyxin də kifayət qədər nüfuzu var və ona edilən təzyiqlər barədə daha yuxarı eşelona məruzəsi gözləniləndir. QMİ sədrinin devrilməsinin nə dərəcədə mümkün olacağı qeyri-müəyyəndir. Qeyd edək ki, “İmamzadə”nin əməkdaşları İlham Abbasovu və Elbrus Məmmədovu həbs etmişdilər. 

Həbs olunan əməkdaşlardan Elbrus Məmmədova 7 sutka verilsə də, İlham Abbasovu bir gün saxlayıb sonra buraxmışdılar. Elmar Vəliyevin yaxın qohumu olan və onun “İmamzadə”yə təyin etdiyi Namiq Allahverdiyev azad edilmiş, 7 sutka həbs cəzası alan dindar Elbrus Məmmədov 2 gün sonra Gəncə Apellyasiya Məhkəməsi tərəfindən cərimə olunaraq azadlığa buraxılmış, “İmamzadə” ziyarətgahının bağlanmış qapıları yenidən ziyarətçilərin üzünə açılmışdı.

10 minlərlə insanın qarşısında xütbə verən Hacı Tahirin nitqi Elmar Vəliyevin qəzəbinə səbəb olub. Hacı Tahir xütbəsində təbii ki, İmam Hüseynin şəhadətindən danışıb və Kərbəla müsibətinin tarixi dərsləri haqqında geniş moizə edib. 

Çıxışının sonunda prezident İlham Əliyevin İslam dininə göstərdiyi xoş münasibətdən və onun “İmamzadə” ziyarətgahını abadlaşdırmasından danışan Hacı Tahir, prezidentə buna görə təşəkkürünü bildirib. Hər şey də bundan sonra başlayıb.

Aşuranın 7-də Elmar Vəliyev youtubedə Gəncə Aşurasından çəkilən və yerləşdirilən videoya baxaraq daha da qəzəblənib. O, bu qəzəbini şəhər ictimaiyyətinin iclasına dəvət olunmayan Hacı Tahirin qarasınca iclasda bildirib və onun bütpərəstlikdə ittiham edib.

Hacı Tahir bildirmişdi: “Elmar Vəliyev məni şəhər ictimaiyyətinin qarşısında təhqir edib. “Aşura” günündə “İmamzadə”də prezident İlham Əliyevin ünvanına dediyim xoş sözlərdən sonra mənə “bütpərəst” deyib və məni hədəfə götürüb. 

“İmamzadə”yə Namiq Həsən oğlu Allahverdiyev adlı bir qohumunu təyin etdi və mənim adamlarımı, idarənin əməkdaşlarını iş görə bilməyəcək hala gətirdi. Dindar ovuna başlayıb şəhərdə.”