AZ
RU
.png)
Nazirlik 3 minə yaxın keçmiş məhkuma birdəfəlik müavinət verib
Bu ilin birinci yarımili ərzində Əmək və Əhalinin Sosial Müdafiəsi Nazirliyinin (ƏƏSMN) rayon (şəhər) Əhalinin sosial müdafiəsi mərkəzləri penitensiar müəssisələrdə cəza çəkməkdən azad olunmuş, tibbi və sosial yardıma ehtiyac duyan 2830 nəfər şəxsi birdəfəlik pul müavinəti ilə təmin edib
Xeberinfo.com": Nazirliyin İctimaiyyətlə əlaqələr şöbəsinə istinadən bildiririk ki, müvafiq qanunvericiliyə uyğun olaraq, həmin şəxslərin hər birinə minimum əmək haqqının 4 misli məbləğində, yəni 420 manat məbləğində birdəfəlik pul müavinəti verilib.
Penitensiar müəssisələrdə cəza müddəti başa çatmaqda olan şəxslərin gələcək məşğulluğunun dəstəklənməsi üçün onların peşə reabilitasiyası istiqamətində tədbirlər cari ilin 6 ayında da davam etdirilib. Bu müddətdə cəzaçəkmə müəssisələrində cəza çəkməkdən azad ediləcək 45 nəfər şəxs, o cümlədən 29 nəfər üçün kompüter istifadəçisi, 16 nəfər üçün isə mebel quraşdırıcısı peşəsi üzrə peşə hazırlığı kursları təşkil olunub.
Hazırda ƏƏSMN-nin sifarişi ilə Qobustan rayonunda inşa olunan Penitensiar müəssisələrdə cəza çəkməkdən azad olunmuş şəxslər üçün 50 yerlik Sosial Adaptasiya Mərkəzi qeyd olunan şəxslərin sosial adaptasiyası, onların sosial mühitə uyğunlaşdırılması, hüquq və azadlıqlarının müdafiəsi və s. kimi məqsədlərə xidmət edəcək.
