Dekabr ayının 9-da Vətəndaş Həmrəyliyi Partiyasının Siyasi Şurasının iclası keçirilib. İclasda növbədənkənar parlament seçkiləri müzakirə edilib.

Yenixeber.org: VHP sədri Sabir Rüstəmxanlı ölkədəki ictimai-siyasi vəziyyət, növbədənkənar parlament seçkiləri ilə bağlı yaranmış yeni siyasi situasiya haqda geniş çıxış etdi. Sabir Rüstəmxanlı VHP-nin hər zaman parlamentdə təmsil olunduğunu və partiyanın parlament fəaliyyətinin uğurlu olduğunu bildirərək qarşıdan gələn seçkilərdə də iştirakın vacibliyini diqqətə çatdırdı.

Daha sonra millət vəkili, VHP sədrinin müavini Fəzail İbrahimli çıxış edərək partiyanın parlament seçkilərində iştirakına tərafdar olduğunu bildirdi.

VHP seçki qərargahının rəhbəri, mərkəzi icra aparatının rəhbəri Samir Əsədli partiyanın seçki hazırlığı, seçki ilə bağlı təqvim planını siyasi şura üzvlərinin diqqətinə çatdırdı. VHP Siyasi Şurası partiyanın 9 fevral 2020-ci il parlament seçkilərində iştirakına qərar verdi. VHP-nin parlament seçkilərində səlahiyyətli nümayəndələrinin siyahısı və maliyyə məsələləri üzrə məsul şəxs təsdiq edildi.