ABŞ prezidenti Donald Trampın Türkiyə əleyhinə atdığı təktərəfli addımlar və təhdid siyasəti ABŞ ictimaiyyətində mübahisələri genişləndirməkdədir.

Yenixeber.org: NATO-nun sabiq Avropa müttəfiqlər komandiri Ceyms Stavridis Türkiyədə həbsdə saxlanılan amerikalı rahib Endryu Bransona görə iki ölkə arasında yaranan böhranın yalnız diplomatik yolla həll edilə biləcəyini deyib.

Komandir bildirib ki, Tramp NATO-ya önəmli dərəcədə fayda verən Türkiyənin əhəmiyyətini anlamalıdır. Əks təqdirdə, Türkiyə NATO-dan ayrılarsa, bu, ittifaq üçün fəlakət olacaq:

“Bu problemin bir nömrəli həll yolu Türkiyəyə bir səfir göndərməkdir. Orada hələ də səfirimiz yoxdur. Məsələni diplomatik yollarla həll etməliyik. Türkiyənin NATO-dan ayrılması ehtimalı 10%-dir. Lakin bu ehtimalın müzakirə edilməsi belə insanı şoka salır. Türkiyənin son günlərdə Rusiya ilə yaxınlaşması isə narahatlıqları daha da artırır. Türkiyə NATO-dan ayrılmamalı. Birinci, potensialına görə. Bu ölkə NATO-dakı ən böyük ikinci orduya sahibdir. İkincisi, geosiyasi baxımdan ən problemli bölgənin sərhədində yerləşir. Üçüncüsü isə simvolikdir. Bu günə qədər çox əhəmiyyətli bir şəkildə önə çıxan hər hansı ölkə NATO-nu tərk etmədi. Bu, NATO üçün fəlakət olar”.