ABŞ İranla imzalanan nüvə müqaviləsini tərk etməyib, sadəcə olaraq, Tehranın ayrı sahələrdə davranışı Vaşinqtonun və Trampın xoşuna gəlmir

Yenixeber.org: Bu sözləri ABŞ Prezidenti Donald Trampın İranla bağlı yeni strategiyasını dəyərləndirən politoloq, millət vəkili Rasim Musabəyov deyib. Deputat bildirib ki, Donald Tramp birbaşa ABŞ tərəfindən İrana qarşı sanksiyaların tətbiq edilməsini istəyir:

“ABŞ İranla imzalanan nüvə müqaviləsini tərk etməyib, sadəcə olaraq Tehranın ayrı sahələrdə davranışı Vaşinqtonun və Trampın xoşuna gəlmir. ABŞ şirkətləri onsuz da bu sanksiyalarsız İranla çox ehtiyatla davranırdılar. O üzdən ABŞ bu ölkəyə heç bir investisya yatırmamışdı. Embarqolar aradan qaldırıldıqdan sonra İran sadəcə bank əməliyyatları həyata keçirmək və dondurulmuş vəsaitləri əldə etmək imkanı əldə etmişdi. Ona görə də ABŞ-ın İrana qarşı bu hərəkətindən sonra yaxın zamanda hansısa ciddi hadisələrin baş verəcəyini gözləmirəm. Yəni ABŞ və İran arasındakı bu durum açıq hərbi qarşıdurma səviyyəsinə qalxmadığı halda regionda real olaraq heç nə dəyişməyəcək”.

Qeyd edək ki, ABŞ Prezidenti Donald Trampın yeni strategiyası ilə bağlı sənəddə əsas hədəfin İranın nüvə silahı əldə etməsinin qarşısını almaq olduğu açıqlanıb.