Ötən gün Mayamidə keçirilən ABŞ-Ukrayna danışıqlarında Ukrayna nümayəndə heyəti ölkənin Silahlı Qüvvələrinin Donbasın qalan ərazisindən çıxarılmayacağını bəyan edib.

Yenixeber.org: Ukrayna hakimiyyətindəki məlumatlı mənbələrdən “RBC-Ukrayna”-ya daxil olan məlumata görə, ABŞ ilə danışıqlarda Ukrayna nümayəndələri sülh müqaviləsi naminə qoşunların Donbasın işğal olunmamış hissəsindən çıxarılmasını qeyri-mümkün hesab ediblər.

Onların sözlərinə görə, görüşdəki müzakirə potensial sülh müqaviləsinin "problemli məsələləri" üzərində qurulub və tərəflər ərazilər məsələsinə xeyli vaxt ayırıblar. Eyni zamanda, Amerika tərəfi Ukrayna nümayəndə heyətinə Ukrayna qüvvələrinin Donbasdan tamamilə çıxarılmasını tələb edən Rusiyanın mövqeyini çatdırıb.

Ukraynalı nümayəndələr qeyd ediblər ki, konstitusiya məhdudiyyətləri, Ukraynadakı ictimai rəy və bu tələbin yerdəki real vəziyyətlə uyğunsuzluğu səbəbindən belə bir yanaşma mümkün deyil. Buna görə də Kiyevin mövqeyi dəyişməz olaraq qalır: ərazi ilə bağlı müzakirə hazırkı təmas xəttindən başlamalıdır. “Potensial həll yollarının axtarışı davam edir, amma bu, əlbəttə ki, çox mürəkkəb bir məsələdir", - deyə mənbə “RBC-Ukrayna”-ya bildirib.

"Amerikalılar arqumentlərimizi dinləməyə hazırdırlar. Başqa bir məsələ isə odur ki, onlar daim deyirlər: Yaxşı, siz 100% haqlı ola bilərsiniz, amma qarşı tərəf də var və o, bunu və bunu tələb edir. Biz vasitəçi olaraq sülh razılaşmasına nail olmağınızı təmin etməliyik. Mövqeyinizi istədiyiniz qədər məntiqi şəkildə izah edə bilərsiniz, amma qarşı tərəf "yox" desə, onda biz nə edəcəyik?", - deyə mənbə izah edib.

Eyni zamanda, danışıqlarla tanış olan “CNN”-n mənbələri qeyd edib ki, Donbasın işğal olunmamış hissəsinin köçürülməsi "məqbul həddi aşır", çünki bu, Ukraynanın müdafiəsini əhəmiyyətli dərəcədə zəiflədəcək və gələcək təcavüz ehtimalını artıracaq. "Lakin bu, konstitusiya müddəalarını qorumaq və Ukraynanın təhlükəsizliyini təmin etmək üçün potensial yolların olmadığı anlamına gəlmir", - deyə mənbə vurğulayıb. Eyni zamanda, o əlavə edib ki, tərəflər Ukraynanın Rusiya ilə müvafiq müqavilə bağlamaqla NATO-ya qoşulmaq imkanından faktiki olaraq məhrum ediləcəyi ssenarini müzakirə ediblər. Belə ki, heç kim Kiyevi alyansa qoşulmaq istəklərindən əl çəkməyə qanunla məcbur etməyəcək. Ancaq əvəzində, Rusiya ilə NATO arasında Ukraynanın alyansa qəbul edilməməsinə dair razılşama olacaq. Yəni, Ukraynanın iştirakı və razılığı olmadan NATO ilə Rusiya Kiyevin alyansa qəbul edilməyəcəyinə dair razılaşır, Ukraynanın isə öz konstitusiyasına buna dair dəyişiklik etməsinə lüzum qalmır.

Öz növbəsində, yüksək vəzifəli Amerika rəsmisi “The Wall Street Journal”-a bildirib ki, danışıqlar zamanı Kiyev və Vaşinqton Ukraynada yeni seçkilərin mümkün vaxtını müzakirə ediblər, lakin ABŞ və Qərb tərəfindən ölkəyə veriləcək təhlükəsizlik zəmanəti məsələsini həll etməyiblər.(Azpolitika)