Rusiya qoşunlarının Ukraynaya basqın edəcəyi təqdirdə ABŞ Kiyevə hərbi yardımı genişləndirmək də daxil olmaqla, cavab tədbirləri görməyə hazır olacaq.

Yenixeber.org: Bu barədə çərşənbə günü jurnalistlər üçün xüsusi telefon brifinqində Amerika administrasiyasının yüksək rütbəli nümayəndəsi bildirib.

Onun sözlərinə görə, ABŞ, o cümlədən Rusiyanın iqtisadi və maliyyə sisteminə qarşı sanksiyalar tətbiq etməklə, eləcə də şərq istiqamətində NATO-nun mövqelərini gücləndirməklə "Rusiya Ukraynaya təcavüz etsə, cavab verməyə hazırdır". "Biz həmçinin Ukraynaya öz ərazisini müdafiə etmək və Rusiyanın mümkün işğalına cavab vermək üçün ona hərbi yardımı artırmağa hazırıq", - Amerika administrasiyasının sözçüsü bildirib.

Onun sözlərinə görə, Kiyev Donbassda atəşkəslə bağlı əldə olunmuş razılaşmaları inkişaf etdirməyə çalışır.

O xatırladıb ki, bundan əvvəl Donbassdakı vəziyyətin nizamlanması üzrə təmas qrupunun görüşündə atəşkəs rejiminə tam əməl olunmasına qayıtmaq barədə razılığa gəlmək mümkün olub.