Antalyadan təlim-məşq toplanışından qayıdan “Qəbələ” bütün diqqətini heyətinin gücləndirilməsinə yönəldib.

Xeberinfo.com:   Klubdan verilən məlumata görə, Türkiyədə komanda ilə birgə hazırlıq keçmiş yeni futbolçulardan ikisinin taleyinə aydınlıq gəlib.

İlk iki dövrəni “Kəpəz”də keçirmiş Rəşad Eyyubov Antalya toplanışında baş məşqçi Roman Qriqorçukun inamını qazana bilib. Sabah hücumameyilli yarımmüdafiəçi ilə münasibətlər rəsmiləşdiriləcək. “Qəbələ” rəhbərliyi Eyyubovla 2 illik sözləşməyə qol çəkəcək.

Qriqorçuk Antalya toplanışında iştirak etmiş Azərbaycan yığmasının üzvü Pavel Paşayevin də Bakıya gəlməsini istəyib. Bu isə o deməkdi ki, ukraynalı çalışdırıcı 28 yaşlı müdafiəçini də komandasına götürməyə qərar verib. Paşayevlə də münasibətlərin sabah rəsmiləşdiriləcəyi gözlənilir.

Baxışda olmuş digər futbolçu Emerson Brito dos Santosla bağlı qərar isə hələ verilməyib. “Qəbələ”nin Türkiyədəki toplanışı zamanı cəmi 1 məşqdə iştirak edən hücumçu bu günlərdə Azərbaycana gələcək. Qriqorçuk onu daha bir neçə məşq prosesində sınaqdan keçirmək niyyətindədi. “Sambaçı” təcrübəli çalışdırıcının diqqətini cəlb edə bilsə, onunla da münasibətlər rəsmiləşdiriləcək. Emerson azad agent statusu daşıdığından, “qırmızı-qaralar” 25 yaşlı forvardın transferinin gecikməsindən narahat deyillər.

Qeyd edək ki, qış transfer dövründə baş məşqçi Roman Qriqorçuk və braziliyalı müdafiəçi Rafael Santosla yeni müqavilə bağlayan “Qəbələ” klubu Fakundo Pereyra, Derlis Meza Kolli, Vüqar Nadirov, Vaqif Cavadov və George Floresku ilə yolları ayırıb.