Son vaxtlar kənd rayonlarında iri və xırda buynuzlu heyvanların və ətin qiyməti ucuzlaşıb. Bunu şərtləndirən bir sıra səbəblər var.

"Xeberinfo.com":  Trend-ə daxil olan məlumata görə, bu səbəblərdən biri təbii ki, idxalın artımıdır. Bunu iqtisadi ekspertlər də təsdiq edirlər.
Açıqlanan statistikaya görə, 2014-cü ildə əvvəlki illə müqayisədə Azərbaycana idxal olunan ət 28,2 faiz artıb, yəni 2013-cü ildə ölkəyə 15 milyon 181 min dollar məbləğində ət idxal olunmuşdusa, 2014-cü ildə bu göstərici 19 milyon 460 min dollar olub.
Digər səbəb kimi, təbii şərtlər göstərilir. İl quraqlıq keçdiyi üçün ot və digər yemin tədarükü həddən artıq bahalaşıb və bu bahalaşmanın qarşısında heyvan saxlamaq, mal-qara əti tədarük etmək xərcləri də təbii ki, artıb. Bu isə heyvanların diri və ya ət şəkildə kütləvi surətdə bazara satışa çıxarılmasına səbəb olub. Təbii ki, bu sayın artması avtomatik olaraq qiymətlərin düşməsi deməkdir.
Səbəblərdən biri də kənd rayonlarında yas yerlərində ehsana qoyulan qadağadır. Misal üçün, qərb rayonlarını, o cümlədən Qazax, Tovuz, Ağstafa, Şəmkir və s. göstərmək olar. Qadağalara qədər yas yerlərində əsasən mal əti olmaqla iri və xırda buynuzlu heyvan ətindən bişirilən yeməklər ehsan verilirdi. Adətə görə, hər adam üçün 200-250 qram ət nəzərdə tutulurdu.
Yəni əgər 500 nəfər yas yerinə gəlirdisə, bu təxminən 125 kq ət demək idi. Bu çəki də təqribən bir baş mal və ya 5 ədəd xırda heyvan deməkdir. Yəni bir gündə rayon ərazisində 5-6 yas mərasimi olardısa, bu rəqəmin nə qədər olduğu bəllidir.
Belə olan şəraitdə avtomatik olaraq ət məhsulları, o cümlədən xammalı ölkə ərazisində əldə edilən və mal ətindən hazırlanan konservlər, kolbasa, sosislər və digər məhsulların da qiyməti düşməlidir və bu proses təbii ki, restoran, kafe, iaşə obyektlərində, ən əsası da şadlıq evlərində özünü göstərməlidir.